知名藝人任達華昨日在醫院接受第二次手術,太太琦琦一直在醫院陪伴,至晚上約7時40分她戴Cap帽及口罩離開。

問到任達華情況,琦琦說:「手術好順利,佢話我成日冇瞓,所以叫我返去,佢都攰都要瞓。(佢手指郁唔郁到?)好成功,依家休息緊。(佢有冇戒口?)佢只係飲咗水同食少少粥。(腹部傷口點?)全部都好順利,佢都有問使唔使叫司機買嘢畀記者食,叫大家唔使等,好多謝大家關心。」

問到任達華明天是否轉到普通病房?

她表示要明早等醫生再安排。問是否放下心頭大石?她說:「佢成日報喜不報憂,唔想我擔心,希望佢快啲好番。」

「(華哥出事有冇嚇親囡囡?)我諗唔止屋企人,身邊所有朋友都擔心,依家進展順利,多謝晒。(聽日你係咪再嚟?)我日日都會嚟陪佢。(你係咪停工唔出埠住?)老公係最重要,我會盡量陪住佢。」之後琦琦登上七人車離開。

 

 

 

 

 

 

 

 

 

(綜合報道 / on.cc)