黃淑儀(Gigi姐)日前娶新抱,她與第二任丈夫徐景清所生的兒子、現年33歲的徐肇麟於加拿大時間6月29日,與拍拖3年的「波友」女友Karen結婚!

黃淑儀的四名子女已長大成人,首次做奶奶的她坦言等到頸都長~

嘉賓下午先在女皇公園觀禮,晚上移師到Westin Wall Centre Hotel酒店出席婚宴。GiGi姐的圈中好友鄭婉琴、李影、胡燕儀和程小東太太及女兒Sharon等都有出席婚宴。

此外,GiGi姐與前夫劉芳剛所生的大女劉德藍、2子劉德政都有專誠賀同母異父的弟弟結婚,足見一家人感情不俗。

肇麟長居於加拿大,本身是一名工程師,GiGi坦言兒子從來不用自己擔心,她說:「4個兒女全部都已經長大成人,我從來唔會畀壓力佢哋要去成家立室,但等到今年,終於等到肇麟同女友結婚。之前大女結咗婚,我就做外母,但做奶奶都係第一次,我都有交足功課呢!一對新人、兄弟姊妹和伴娘伴郎咁多套禮服、婚禮用具同送畀賓客嘅禮物,全部都由我負責,另外仲特地買咗一條金鏈,配上一個拳頭咁大嘅龍鳳呈祥金牌送畀新抱,就當係送畀新人嘅禮物。」

婚禮前的數天,GiGi姐忙個不停,她說:「我都係不停進出機場去接機,仲有打掃好屋企嘅房間,等遠道嚟參加婚禮嘅親戚朋友住宿。然後到咗婚禮嘅前一日,我同先生仲有阿仔就喺家中舉行咗一個告別單身派對,下廚整咗好多嘢食招呼朋友。到婚禮的早上,又一早起身焗蛋糕畀大家食,總之整天就忙個不停。直到婚禮之後嗰個晚上先係最舒適,可以一家人聚喺屋企,慢慢食個晚飯談天說地。」

已進軍娛樂圈的細仔徐肇平(Shaopin)正在忙著拍攝ViuTV劇集《娛樂風雲》,已特地於數個月前向劇組請了10天假期,偕同圈外女友一起返回溫哥華出席哥哥的婚禮:「我最大嘅任務就係『娛賓』,同埋帶女友遊山玩水,喺溫哥華雖然唔使工作,但每天嘅行程確實比喺香港拍劇仲要忙。」

Shaopin更表示:「我好高興哥哥能搵到一位,同佢一樣擁有同等愛心同懂得關懷別人嘅另一半。跟一個好似我咁佻皮嘅弟弟一齊成長,哥哥真係花咗唔少努力,亦克服咗很多內心爭鬥同挑戰!佢喺是我眼中係最有耐性及懂得體諒別人嘅人。從小到大,凡事佢都係以身作則,做事從不問回報。因此佢現在能搵到一位好太太,我真係比佢仲高興!」

Gigi姐兒子肇麟親自為婚禮設計的回禮杯墊,一面是香木板,一面是驅蟲板,有三種作用,超有心思!

(綜合報道)