藝人蘇施黃(阿蘇)和拍檔和泉素行出席節目《厲害了!蘇哥兒》的造勢活動,席間分別同觀眾和商戶玩遊戲炒熱氣氛。

阿蘇表示非普通純旅遊,是深度介紹日本人文化、互相幫助精神,問到是否有同患子宮癌正接受化療的密友金燕玲一齊睇?她說就連自己都冇睇:「我都係上網睇番,金燕玲就一係瞓咗覺、一係打緊牌,但叫佢睇嘅話都好快睇晒。」問到金燕玲現時的身體情況?

64歲金燕玲今年初發現患有子宮癌,要接受6次化療。其間她指曾因為甩頭髮而傷心到喊,而接受化療的痛,嗰種由骨痛出嚟嘅痛楚令她直言感受到甚麼叫生不如死!

雖然非常痛苦,但仍選擇積極抗癌,不時上阿蘇節目跟大家分享病情進展,其樂觀心態激勵不少聽衆!

阿蘇雙手合十感謝兼報喜:「非常好!有心!佢做晒所有化療,6次非常辛苦都捱過咗,今個星期開始做電療,7月中就乜都做晒,好多謝關心嘅朋友咁支持。(會考慮同金燕玲移民去鹿兒島?)」

「我自己就幾好,同佢就唔使旨意,唔會睬我,因為佢怕悶驚冇朋友、冇雀友、冇得跳舞。(度假呢?)都冇可能,好少同佢去旅行,我哋自己有一個相處方法,去旅行驚嗌交。」

早前三度「生蛇」(帶狀疱疹)的阿蘇大派定心丸謂已痊愈,又指去完日本拍攝後肥足5、6磅:「拍攝好趕,冇時間食飯,午餐同晚餐成日都食牛肉飯,所以返嚟搵方力申游水、學行路,一個星期做3至4日運動。」

而和泉素行亦謂肥了10磅,阿蘇接話開始實行Green Monday:「本身我係食肉怪,一開始都好辛苦,覺得食極唔飽,但第二個星期開始就習慣。」

 

 

 

 

(綜合報道 / on.cc)