藝人薛家燕早前到澳門的安老院進行探訪,與一眾老友記傾偈、唱歌,氣氛樂也融融。家燕姐甫入老人院,已獲30位老友記拍掌歡迎。現場不少老友記大讚家燕姐靚女!

家燕姐亦搞笑說:「係呀,我愈做愈靚,係粒癦大咗啲啫,好多人都叫我做大粒墨。佢哋係值得尊敬嘅長者,社會有今日嘅成就,係靠佢哋創造出嚟,啲哥哥姐姐年紀大咗冇乜要求,需要人同佢傾吓偈、關心吓佢,所以我見到你哋係我嘅福氣。」

家燕姐更溫馨地與她們握手及噓寒問暖一番,還即場加插唱歌環節,送上一曲《萬水千山總是情》,有位年近80歲的長者亦清唱一曲《朋友》送給家燕姐。

對於獲老友記大讚瘦咗又靚咗,家燕姐說:「我係清減咗啲,每餐都食少少!」其實她上月已開始節食減肥,為本月尾的澳門站演唱會作準備,就算當日面對肥美的芝士海膽焗波士頓龍蝦、炸乳鴿,亦要忍口,只吃了西芹炒魚鬆,全因想以最佳最Fit狀態見歌迷!活動結束前,家燕姐更向安老院送上演唱會門票,希望為長者們帶來更多娛樂。

 

 

 

 

(on.cc)