再度榮升做爸爸、誕下第二名小公主的天王郭富城風騷出席環保活動。甫受訪,一臉慈父樣的城城難掩喜悅,主動向記者分享「二寶」!

「細女出世之後未見過大家,二寶喺4月出世,中文名仲研究緊,英文名叫Charlotte,因為想同大女(Chantelle)一樣都係用『Ch』開頭。」

之前太太方媛(Moka)出Post爆大女呷醋?城城笑住承認:「有少少啦!我抱住BB佢就有少少呷醋,咁我都仲係新手,都慢慢學習緊,都OK嘅,會氹吓大女。(可以一湊二?)細女都仲細,得個幾月未出得街,遲啲一家大細再去公園玩。」

講到Moka得天獨厚極速收身成功大露纖腰,城城冧笑話「OK」,然後心痛謂:「佢好辛苦!(點樣獎勵佢?)錫佢多啲!自從今次二寶出世,發覺媽媽真係好偉大,佢兩次都係順產,過程都好辛苦。」

續透露兩次都有入產房陪同太太,更有幫手剪臍帶:「睇住佢哋兩個出世,覺得好開心、好幸福、好感動。(有冇眼濕濕?)唔可以用言語去表達,心入面個感覺好唔同,係好幸福嘅感覺!」全程笑笑口回答,認真幸福滿瀉!


問到可會繼續追「慈姑椗」?城城肯定謂:「暫時唔會住,呢個世代嘅思想,仔女都真係冇所謂,最緊要係健健康康,我唔知有仔仔係咩感受,但依家有兩個女都好滿足!睇到太太喺分娩過程好辛苦,真係好偉大,想太太休息吓先!」名乎其實是愛妻號!


講到環保方面,他大力支持宣揚環保訊息:「唔單止自己,亦提醒咗我要教育下一代,要做好榜樣。例如教囡囡用環保餐具,減少用一次性塑膠,灌輸保護地球的重要與責任,呢樣係累積番嚟嘅美德。」

城城更自爆每朝都會食菠蘿包做早餐,會叫家傭攜環保飯盒去購買,亦會用咖啡壺去買咖啡。

(on.cc)