馮鎵瀠(Naomi)前日忽然在facebook轉貼52歲林利的婚訊,爆seed寸他的未婚妻陳貞鈞(Erin),更稱對方是「情敵」(相關新聞:https://bit.ly/2JCao0e,Naomi還貼出Erin舊相,讓友人評頭品足。

身在台灣的林利接受《蘋果》電話訪問,對於Naomi指跟其未婚妻Erin是舊情敵,還聲稱Erin曾做出恐怖行動。林利就回應話:「好事,好多朋友、唔識嘅人都會送祝福,但借呢啲事嚟抽水,仲要踩人,呢個女人(Naomi)我又唔識佢,我諗佢好極有限,大家唔識嘅,你做咩要無端端講呢啲咁嘅嘢,無憑無據,仲要編一個咁冇邏輯嘅古仔出嚟,個故事仲咁渣,佢呢個人好X衰。」

林利愈講愈㷫說:「我娶老婆,我娶乜人關你X事,係咪?點可以咁樣寫『恭喜我娶咗啲咁嘅人!』我依家娶咗個咩人呀,我又唔X識你,依家咩事,做乜嘢要借我嚟宣傳,你咩料呀,我唔會再回應,不過呢個人好打有限,X佢就X佢,大家又不相識,人哋咁喜慶時候,又唔關你事,你攞出嚟炒新聞,仲要係十幾年前嘢,又引證唔到,我哋都唔記得十年前嘅嘢,我娶乜人關佢Q事,所以一定要X。」

林利強調:「我問過老婆,都話唔識佢,成篇故仔睇唔明,又跳車又反鎖,全部老作,借我哋過橋真係cheap,我真係X佢,再講我告佢!」

對於被林利斥「老作」見報,Naomi今日回覆《蘋果》稱好嬲:「唔想幫一個喺香港零知名度嘅台灣女人見報。麻煩轉告前輩,我係一個網民去回憶我嘅往事,炒新聞我要用都會用我表哥(林俊賢),唔需要用到佢,祝佢復出後大紅大紫⋯⋯。如果林前輩他日上到紅館開演唱會,我一定買飛入場支持佢。以示尊敬前輩!我就無咁嘅機會,所以唔需要做宣傳。」問到當年與Erin爭誰?她說:「我唔回應個男士嘅身份啦。」

(綜合報道)