早前《愛.回家之開心速遞》其中一集講到「金城安」周嘉洛與進擊的「池美麗」鍾凱琪經歷生死關頭後,內心開始被女方誠意打動,但同時又好愛女友Bonnie(林凱恩飾),令佢陷入兩難!

 

唔知點揀?不如畀大家幫佢揀啦,See See TVB facebook專頁上載咗段安仔感情路上的抉擇,除咗兩女,竟然仲有C餐揀添!

首先,A餐係對自己癡心一片嘅池美麗,一直對安仔窮追不捨,雖然樣貌唔算出眾,但願意迎合男方興趣,嘗試融入朋友圈陪安仔一齊打機,最近更為免安仔捱餓而犧牲自己最鍾意嘅食物,搞到自己暈低入醫院,兩人可謂經歷過生死,患難見真情!

而B餐就係溫柔細心嘅Bonnie,入得廚房出得廳堂!

不過佢就有個十分傳統嘅爸爸「譚道德」,安仔有次更誤以為譚道德係Bonnie,獻出男男初吻!

最後C餐就係好兄弟「朱凌凌」吳偉豪,就算安仔唔講出口,佢都知安仔個心諗啲咩!「安凌CP」一直都非常得觀眾歡心,呢對好兄弟成日曖曖昧昧,睇得觀眾心癢癢!如果你係安仔,你又會點揀呢?

短片一出,好多網民都紛紛留言做出選擇,不過幾乎一面倒力撐男男戀「安凌CP」,連Bonnie都輸畀朱凌凌,有網民仲大讚佢兩個一齊超級養眼,睇嚟編劇想滿足觀眾就識做啦!

大家又會點揀呢?

 

 

 

(綜合報道 / on.cc)