因爸爸小黑生前在香港有不少好友,於是他在香港補擺喜酒,邀請父輩好友,見證他的人生人事!

已故特技演員柯受良(小黑)的兒子柯有倫去年與圈外女友Donna(朵拉)登記結婚。

昨日大約下午3時40分左右,見到有兩架黑色七人車駛入淺水灣一會所,一對新人下車,Donna身穿一襲拖尾婚紗,不過為免弄污婚紗,所以她手執婚紗的尾部而行,因為要趕入會場,他們表示稍後才安排大家拍照。

現場所見,場外擺放了不少一對新人在宜蘭拍攝的婚紗照,柯有倫的好友亦忙於佈置場地。

賓客方面,包括有張學友、劉偉強、曾志偉、曾國祥、苗僑偉夫婦、陳小春和應采兒等等。曾志偉到場後,安排一班藝人賓客包括三哥、學友、任賢齊、吳君如、陳可辛、柯有倫媽媽及女方家人、兄弟姊妹及一對新人給傳媒影大合照,志偉在訪問時表示,自己跟小黑是好兄弟:「好似自己娶新抱一樣,我同學友佢哋都睇住佢大,有倫就好似我半個仔咁,我都好耐冇見有倫媽媽,所以今日好開心。」

問到志偉會否叫他們盡快生B?志偉說:「都要㗎喇,睇吓佢個妹,話咁快就3個細路,個小朋友仲高過我,高過我唔難,呢個係標準第一關,所以時間過得好快。」問他有甚麼說話寄語一對新人?他說:「最緊要都係幸福、開心、快樂,我自己都係啱啱見到新娘,仲笑佢唔知識唔識講嘢,不過最緊要有倫鍾意。」至於會否代小黑寄語有倫?志偉就話:「都盡在不言中,之前知道有倫喺香港擺酒,都代佢通知其他uncle,個個都mark晒期嚟出席。」

柯有倫媽媽在門口迎接賓客,她一見到三哥夫婦即高興到上前擁抱。三哥帶同人情,希望一對新人幸福恩愛。柯有倫與太太表示想先生女,三哥就說:「生女先可以,之後再生個仔啦,一個好字。」三哥又說:「由細睇到佢大,不過小黑走咗之後,佢哋大部份時間都喺台灣,都好耐冇聯絡,今日見到小華(柯有倫媽媽)都好開心。咁多年嚟都知道Alan喺台灣都好多工作,佢好有才華。之前志偉話Alan結婚,以為要去台灣飲,點知喺香港擺,我話一定要到啦。」

三哥剛完成訪問,學友就單拖抵達,柯有倫媽媽再次上前相迎,攬着學友說:「好開心見到你哋」學友表示今日準備了禮金:「由細睇到佢大,希望佢哋開心幸福。應該要早生貴子,要追番啲細佬妹。」

柯有倫接受台灣傳媒訪問並對亡父說出心底話:「感恩我的父親,把我們帶到這個世界上,我爸爸是最棒的,我們全家人都很想念你、都很愛你,也相信你都看到我們平安。」柯有倫更向老婆說出愛的宣言:「謝謝老婆接受不完美的我,也謝謝太太,讓我找到存在的理由!」稍後他亦會擇吉日回到台東,一方面與90多歲的奶奶慶祝、順道補辦婚禮,邀請老家街坊鄰居和爸爸的老友一起參加。

(綜合報道/apple daily)