昨日有報道指一位育有5名兒女的38歲單親菲傭,於香港工作期間確診患癌,結果即被香港僱主終止合約,理由是因為她患癌,更在解僱信中祝她「身體健康」,令人不禁回想起早前藝人梁家輝為家中外傭抗癌的事件(相關新聞:https://goo.gl/8tZiCH)。

梁家輝接受《蘋果》電話訪問,他表示有留意該則新聞,他說:「當然如果可以做啲乜嘢,我亦好樂意去幫手。但問題呢個唔係我僱傭,而且會有好多呢啲事發生,香港好多小家庭,真係afford(負擔)唔起好似我咁做,唔應該搵我嚟做例子。」

此外,家輝又道:「不過我哋應該諗吓,香港有菲傭幫咗我哋咁多年,政府公佈有成38萬人,呢班人嚟香港做嘢,除咗賺香港嘅錢、外匯返印尼、菲律賓之外,其實幫香港無數家庭去解決好多困難,包括最近有學過醫護嘅菲傭,有照顧老人家經驗嘅傭工,都會被社福署考慮納入老人院嘅護理行業。因為第一冇人,二嚟大家憑良心諗下,咁多年嚟,點解有咁多菲傭嚟咗香港,就係因為香港家庭嘅老人家、小朋友,都係靠佢哋幫忙,等兩公婆可以出去打工,將細路交畀外來傭人,大家應該從呢個角度考慮。而唔係一有事就『你返去啦』。」

家輝強調不是責怪該名僱主,要持平去看雙方面情況:「我咁講並唔係責怪嗰位解僱佢嘅僱主,而係應該從另一角度考慮,無論呢位菲傭嚟咗幾耐都好,始終係小家庭嘅一位僱員、一份子。有某一代人,係跟住印傭、菲傭長大,覺得應該從呢個角度去諗。幫到就幫,幫唔到就睇下其他解決方法,施以援手。譬如話諗啲方法,唔好解僱佢,等佢仲享有香港嘅醫療福利,可以喺度醫病。而唔係將我攞嚟做例子,我咁做就人間有情,唔咁做就冇情嘞。咁樣對位僱主唔係好公平,病係人都有,唔通而家醫療體系,你病重嘞,我唔收你,返屋企等死啦!一個社會唔應該係咁。」

至於問到家輝家中傭人目前情況時,他透露基本已經痊癒,只要定期返醫院檢查,腫瘤亦消失,重要是沒有擴散跡象。之後他補充:「我可以同我位外傭睇醫生搵藥。但相信嗰位僱主有佢苦衷,唔係好無情。可能人哋負擔好大,我唔可以用我嘅case去judge人哋。呢個要持平睇雙方面情況。」

 

(綜合報道/apple daily)