郭富城昨日於尖沙嘴出席賀歲活動,坐着吊臂現身的城城,相當有氣勢,城城在台上向市民拜年,又為金龍醒獅點睛。

他更心情大靚,多次主動與司儀葛民輝分享家庭事,被阿葛嘲笑說:「講得家庭咩?小美話唔講得家庭㗎喎,唔關我事㗎!」

城城新年放假兩星期,與家人一同度歲,他又說剛到媽媽家食開年飯,為怕媽媽辛苦煮飯,他今年特別安排到會,吃足16味餸大滿足,他指囡囡已懂得叫嫲嫲,他說:「好開心!作為做仔更加開心,最緊要身體健康。」

城城快將再當爸爸,問到BB性別?他說:「賣個關子,冇論仔同女都開心,囡囡會攬住媽媽錫吓個肚,好開心,因為太太係獨女,都希望多啲小朋友。」城城又自爆原先考慮跟媽媽一樣生夠五個,他說:「我有五個兄弟姊妹,都有考慮過一樣,發覺媽媽好偉大,做家長壓力好大,而家頂多四個好嘞!五個縮到四個,都要睇太太,我好尊重太太。最緊要開心,一個人有工作、家庭同小朋友,真正知道咩叫幸福。」

城城又謂要做好爸爸角色,積極上進做好榜樣,提到今年大計,城城透露將繼續100場世界巡迴演唱會演出,同時會繼續拍戲,又會為今年上映的四部電影宣傳。

同場還有堪輿學家李丞責指點城城,他指城城今年驛馬星動,經常四圍飛,又指城城今年適合置業,可以買車買樓,但宜坐不宜揸,出名愛跑車的城城聽後笑指自囡囡出世後,以駕家庭車為主,載着囡囡會更加安全。

(apple daily)