新年係團聚嘅好時機,就連平時日見夜見嘅《愛.回家之開心速遞》演員都要見一見,真係冤氣呀!

「熊若水」呂慧儀喺Instagram上載大合照,除咗佢帶埋囝囝蟹籽、馬貫東、蘇韻姿、周嘉洛及吳偉豪都喺度!

原來年初二佢哋去咗單立文屋企拜年!

佢哋仲似足拍《愛.回家》咁,排隊𢭃單立文及胡蓓蔚封利是,個個笑到四萬咁口講祝福句子,交足晒戲。

呂慧儀都笑笑口話:「啲祝賀詞直頭聽出耳油!」

網民都話好似睇緊《愛.回家》,好羨慕佢哋感情真係好似家人咁,真係好有愛呀!

(on.cc)