曾被譽為「靚絕五台山」的藍潔瑛,10多年前患上精神分裂及妄想被迫害症,一直在東區醫院接受精神科治療,並要定時覆診及食藥,但病情反覆,大約8年前她獨自遷入馬坑邨良馬樓一單位,靠領取綜援以及好友、粉絲接濟過活,後來藍潔瑛好友又帶她到教會,信奉天主教,藍潔瑛生活總算穩定下來。

豈料去年11月3日,藍潔瑛被友人發現於獨居的赤柱馬坑邨公屋猝逝,估計當時已暴斃兩日,就此結束55載坎坷人生。

藍潔瑛生前所屬教會於同年11月9日晚於赤柱聖亞納堂為藍潔瑛舉行追思彌撒,除藍潔瑛胞姊及教友外,昔日跟她合作演員,包括藍潔瑛電視代表作《大時代》合作的陶大宇、李麗珍和邵仲衡均有到場,一同送別《大時代》玲姐。

原來,藍潔瑛的骨灰在教會安排下,已安放在長沙灣天主教墳場,其生前好友林建明今日特地前往拜祭,並謂日前自己夢見藍潔瑛,笑得很開心、很燦爛。

林建明今日接受《蘋果》訪問時說:「我一向好少發夢,但早幾日藍潔瑛真係出現喺我夢中,佢笑得好開心、好燦爛、好靚,同我以前見佢個樣好唔同,就好似話畀我知,佢喺另一個世界生活得好好、好開心。我記性唔係咁好,今日講完嘅嘢聽日可能唔記得,但今次藍潔瑛出現嘅情景,我竟然記得好清楚。最離奇嘅係…」

「第朝早我起身,藍潔瑛啲朋友就打畀我,話畀我知藍潔瑛喺邊度(即骨灰安放處),所以今日上晝我就同契仔去咗長沙灣天主教墳場探佢,買咗啲好靚嘅花畀佢。嗰度地方都好大,但我一去到就好容易搵到佢,見到佢之後,發覺同我發夢見到佢嘅情景好似好似,都係一樣咁靚咁開心,我覺得係藍潔瑛想話畀所有關心佢嘅朋友知,佢而家好好、好開心,想答謝大家關心,所以我決定將呢件事講出嚟。」

林建明表示,藍潔瑛所住地方環境很美、很寧靜,所有關心及愛護藍潔瑛的朋友們放心。從林建明提供的照片看到,藍潔瑛原來是於去年10月31日猝逝,林建明除到墳場致祭外,她與契仔更有為藍潔瑛墓碑清潔打掃一番。

 

 

 

 

 

(綜合報道 / appledaily)