郭富城以主禮嘉賓身份出席於九展舉行的「十載.電影夢」放映會,城城在會上頒發多個獎項予業界優秀的電影人,他指學院致力培訓有志成為電影工作的年青人,他亦希望成為栽培新血的一份子,有機會也想參與講課:「可以分享經驗,希望將來有機會,將自己過去喺電影學習到嘅知識同竅門,講畀學生知,貢獻吓。今日都見到好多猛人同資深嘅電影人,大家都可以交流。」 

提到太太Moka懷孕5個月,體重只得46kg,會否過瘦?城城說:「多謝關心,今日想講返關於活動嘅嘢,屋企就嚟添新成員,都希望太太可以食番多啲嘢,最緊要係BB健康。」而城城亦直言有叫太太吃多一點。至於憑《無雙》入圍亞洲電影大獎爭影帝,城城就話以平常心面對:「其他嘅我只係睇咗徐崢嘅《我不是藥神》。」問到會否想跟徐崢合作?他說:「入圍係一個鼓勵,合作就睇緣份,攞獎係錦上添花。」

同場獲頒發「傑出貢獻獎」的廖啟智,得知獲此獎項時大感驚訝:「嘩!有啲內疚,其實尚要努力,喺教育方面係未夠班,希望邊學邊教,有時覺得都幾好,係一個挑戰,過程會睇到自己嘅不足,而學生有成績嘅話就係一個鼓勵。」不過智叔並未打算全職教人做戲:「我冇呢個計劃,隨緣、睇機會啦,而家冇呢個渴求,亦冇呢個方向,而家每一個星期教兩節。」

智叔正跟周潤發拍攝一部關於跑步的勵志電影,他說:「聽日發哥畀咗通告係0630,一齊練跑,戲中唔使跑,但戲外就日日要練跑,跑完之後成個人都會好精神,又可以同澳門啲街坊飲茶。」談到之前方中信指跑步追不上發哥要爆粗,智叔笑說:「佢講大咗啲,我覺得佢要求高,我對自己冇乜要求,所以唔會(爆粗)。不過就睇到自己嘅優點,就係會去堅持,原來運動員係有呢個心理素質,但係我就冇呢個體能喇。」智叔還讚發哥步大力雄、腳又長,更有豐富的跑步經驗,每星期的路線都是由發哥來定,他還爆發哥搞笑對話說:「做完運動開心,因為釋放好多安多酚,但發哥就話好多黛安芬。」

(apple daily)