1月7日係洪金寶正日生日,昨日大仔洪天明喺IG貼出一張幫老竇賀壽嘅全家福並寫道:「生日快樂爸爸」,上面除咗壽星爺爺洪金寶之外,仲有嫲嫲高麗虹、爸爸洪天明、媽媽周家蔚、叔叔洪天祥、姑姐洪煦榆、哥哥洪大仁同細佬洪竟琋,一家八口三代同堂,羨煞旁人。唔少網民都送上生日祝福,話真係難得咁齊人添。

由藝人周家蔚和劉永健主持Viu TV新節目《友枱VIP》,今集分別請來殿堂級太極樂隊成員鄧建明(Joey Tang)及雷有輝、吳國敬擔住嘉賓。家蔚表示今集特意為嘉賓準備了下酒菜式,令眾人大飽口福:「會整泰式同西式嘅春卷,呢道菜係我姨整過畀我食,知道嘉賓都好鍾意飲酒,紅酒都離唔開芝士。」

講到老爺洪金寶生日,問到有否親自下廚?她笑話上次邀請對方上節目作客已經當下過廚,不過就自認有點失策:「嗰次煮黑毛豬,煮到出嚟有啲粉紅色佢唔敢食。尋日正日就一齊出咗去食飯,有朋友喺馬來西亞拎咗條大魚返嚟,佢食得好滋味、好開心,咁我就可以休息吓,拍呢個節目都係咁煮嘢食。」

問到老爺可有乘機催生B女?家蔚怕醜話有,搞笑指平時私下都唔敢問對方太多問題,但做節目就唔同,繼而自爆恨生豬女:「喺呢個方向我係Ready,之前唔敢生係因為驚瘦唔番,依家有做緊減肥代餐產品,搵到方法就瘦得唔辛苦。」

但家蔚再爆老公洪天明唔太想生,因為天明經常周圍飛,冇時間陪小朋友都會感到內疚:「佢有講過2個就足夠。(咁兩個仔仔想要細佬妹?)哥哥好想!佢仲會好老積咁同我講生個妹妹畀佢,有時Margaret(鍾麗淇)、盈盈(湯盈盈)、樂怡(姚樂怡)啲女嚟玩都會好照顧佢哋,但細佬就驚佢會呷醋,不過佢玩好多公仔玩具,有妹妹就可以過繼畀佢,都要畀啲壓力老公。」

 

(綜合報道/on.cc)