啱啱先踏入一新年,杜汶澤竟然咁快要大動肝火,佢昨日喺facebook發文,滿腔怒火咁抱怨:「o依家啲人真係好黐線,我正線你副線cut埋嚟車頭hi到我車尾,我啱晒都唔使你賠,咁小事,都要落車嘈,又要報警又剩!」阿澤未嬲完,繼續呻:「好嘞,o依家等差人嘞!塞晒人哋成條路,為乜呢!」

新婚嘅蕭潤邦(Oscar)同江若琳,分別都有留言叫阿澤小心啲馬路自私精,Oscar更加激動話:「馬路上係有好多仆街,我每日都開窗X下佢哋,必須的。」

另外有報道指,阿澤嘅Tesla座駕昨日喺銅鑼灣同一架保時捷相撞,意外後,兩方落車互相爆粗指罵,情緒相當激動。

阿澤喺晚上再次重申係俾人撞:「其實有一點我自細都唔明,有好多人都會認為,一個藝人,如果遇到不公平事,但為咗怕俾人講,就要忍氣吞聲。呢啲係咩邏輯?我從來都唔會。我一定還拖。更何況,我已經無當自己仲做緊呢行好耐啦!藝咩人呀?我只不過係一個好普通嘅香港人。」仲留多個Tag「#互乜X撼呀佢撞我呀onX」。

杜汶澤晚上向《蘋果》講番是次意外時話:「冇事啦,好小事之嘛!我行行下扭埋嚟cut線。跟住我聽到『gap』一聲,少少嘢唔使人賠啦,我又趕時間,我咪走囉,佢呠我喎,又落車鬧喎,我咪問佢『講乜X嘢』囉。互相鬧咗幾句咪報警囉,最衰係塞晒人哋成個銅鑼灣。都冇嘢啦,差人嚟到佢都有少少知道自己唔係幾啱咁樣。我正線你副線cut線埋嚟呀,你車頭撞我車尾,10個揸車10個都知邊個唔啱啦。」

(Apple daily)