富豪劉鑾雄同太太甘比除咗育有大女秀樺及囝囝仲學,上年甘比更為大劉再誕下一女,大劉不知幾開心!

大劉近年好低調,極少出現公開場合。

而甘比就有時同下閨蜜Sammi同紅姑聚會下,同埋打理大劉交畀佢嘅慈善基金。

但每年嘅12月31除夕夜,佢都會攜伴出席倒數派對。上年佢同甘比去咗林建岳開嘅Party,今年佢就同甘比去咗恒大地產老闆許家印嘅倒數派對,同場仲有馬雲、張松橋等。

聽在場嘉賓講,前晚大劉精神唔錯,更難得係佢冇再着住套睡衣出席Party,着住套老西同老婆仔女一齊倒數迎接2019年。

甘比之前都喺IG PO咗3個仔女嘅Q版公仔圖嚟迎接2019。

大劉老婆甘比當日喺會場都好忙,除咗要睇住三個仔女,又要同朋友打招呼,而大劉就更加受歡迎,因平時少出嚟,好多做生意嘅人都當佢係偶像,咁難得見到佢,梗係趁機走埋去,自我介紹或要求影合照。

睇唔出全晚最受歡迎唔係啲性感女郎或主人家,而係財技玩到出神入化嘅大劉。不過成晚都係見許家印同張松橋傍實大劉,佢哋坐埋同一枱,真係傾到雞啄唔斷,聽講佢哋三個成日鬥地主,真係好老友。

(綜合報道/apple daily)