陳山聰、馬德鐘、吳卓羲、苗僑偉、戚美珍、林韋辰、陶大宇、郭政鴻、彭健新、梁烈唯同衛志豪等噚晚眾星到賀,真係夠哂熱鬧!

今日係晨曦副會長周文曦爸爸周謙益97歲生日,生日快樂呀!吳卓羲喺微博PO相留言話:「祝周伯97大壽😊福如東海😁壽比南山😀身體健康😬」

除咗周伯生日之外,原來噚日仲係周文曦同崔嘉寶結婚25周年!

衛志豪喺IG貼出合照,留言祝周伯生日快樂,身壯如牛,再祝曦哥BoBo(崔嘉寶)結婚25周年,永遠甜過蜜糖。

崔嘉寶1986年參選港姐,其後加入無綫劇組,崔嘉寶成為「銀河十星」之一,1995年拍完《情濃大地》便退出娛圈,因為明星足球隊成員而認識晨曦班主周文曦,二人婚後生咗2個囝囝。

而崔嘉寶老爺周謙益為人樂善好施,特別支持家鄉教育發展,周謙益於開平市出生,喜歡睇武俠書,培養出俠義心腸,1941年參加抗日戰爭,1947年取得中山大學學位,先後在香港、美國定居,近年熱衷慈善事業,周謙益曾喺大陸一個專訪中指自己教仔女,有「三不怕」,「不怕吃虧、不要怕髒、不怕辛苦」。

 

(綜合報道/IG/weibo)