梁漢文(Edmond)與太太林文慧於2008年結婚,不知不覺間已踏入10周年。

十年來夫妻二人經歷過唔少風風雨雨,太太於2011年確診乳癌,Edmond陪伴在太太身旁共同面對打敗病魔!

Edmond話最心痛嘅係太太喺患病期間仍然為佢搞演唱會事宜,佢話:「佢病冇講畀人知,最擔心係佢開會時不停吸二手煙。」

梁漢文曾經分享過:「呢五年無論食、生活同各方面都要特別小心,醫生指這類病只要五年內不復發,才算真正找回健康。2017年剛好踏入第五年,看到台下的太太健健康康坐着看我演唱會,這是世界上最好的情人節禮物。」

仲話同太太結婚咁多年最想同佢講嘅係:「感激佢對我好細心。」

而日前Edmond喺社交網上載二人於92年初相識時嘅合照,重溫昔日的日子外,並以此作為慶祝。

Edmond留言:「最近睇返(番)幅相先留意到,原來同佢認識嘅第一日喺92年4月6號,哈哈!嗰日有朋友幫我地(哋)影低咗呢一張兒時合照,都幾有記念性 今日到咗我哋結婚10週(周)年嘅日子,從98年拍拖到08年結婚,呢20年我哋一齊領略過唔同嘅滋味,有喜亦有悲。發生開心事嘅時候我哋會盡情慶祝,遇到唔開心嘅事我哋會互相扶持。希望往後嘅日子你繼續健康快樂 #結婚10週年 #眨吓眼就到 #時間快到有啲驚」

祝佢哋身體健康,愈嚟愈恩愛!

(綜合報道)