早前城城激罕同太太方媛曬出全家福,出席活動時一講起囡囡就笑得勁冧:

「開心見住佢由爬到識行,睇住佢成長係開心事,小朋友成長好快,可以親眼睇住佢成長好Sweet、好幸福,呢刻係好感恩,最緊要健康,有健康先睇到佢成長。」

而方媛最近盛傳再度有喜,但城城一直都唔承認亦唔否認,只係話:「屋企再添成員係開心事,呢排都好多身邊人祝福我,呢樣嘢都係等天安排,大家留意我太太個肚啦!」

 

今日城城出席活動,佢終於報喜啦!城城接受傳媒訪問,提到之前拍咗4部電影,出年都會休息,被問到係咪要抽多啲時間陪屋企人嘅時候,之前一直唔肯正面回應老婆係唔係「有喜」嘅佢,忽然自爆:「要呀!太太要生BB吖嘛!」城城又話,因為係開心事,而且就嚟聖誕,所以想同大家分享,而且收到好多祝福,又知道大家好關注。

佢承認太太懷有第二胎,今次三年抱兩,認真開心!又講笑話:「我之前都叫大家留意我太太個肚啦,你哋下次見到佢,就讓張凳畀佢坐吓喇!」

問到BB性別係男定女時,佢就話:「依家仲未知!」心情大靚嘅城城,全程笑得好開心,問到囡囡知唔知道好快有細佬或者妹妹,佢就話囡囡見到媽咪個肚不停大,都會呵吓錫吓。城城又話生男生女都冇所謂:「男女都係上天嘅恩賜,係好好嘅聖誕同新年禮物。」

再問城城Moka會唔會陀Twins?佢即刻好大反應咁話:「唔係咁誇呀!」至於會否陪老婆入產房,城城就講番上次老婆生囡囡時,佢本來喺開平拍緊戲,佢就即刻趕返香港,然後話:「明年上半年我都係做巡唱,會易就啲。」當記者話BB要出嚟就出嚟,城城就笑住話:「我知,我有晒心理準備,大家放心!」

恭喜哂城城呀!唔知會唔會湊到個「好」字呢!?

 

(綜合報道)