藝人吳綺莉(Elaine)的19歲女兒卓林與31歲太太Andi於11月8日喺加拿大多倫多結婚,二人於當地生活困難更欠租三個月,多倫多租房畀佢哋嘅包租婆已表示唔會追究三個月租金,對佢哋嚟講肯定已經係大解脫。

喺加拿大難以維持生計,卓林惟有返港,回港後二人入住旺角一間平價賓館,但未有新工作,又零收入,搞到喺香港再次拖欠租金,總共二千幾蚊,賓館老闆收唔到錢,惟有報警求助。冇錢交租嘅卓林與Andi最後漏夜拖行李離開賓館。

身無分文又冇地方住嘅卓林,最終都係要搵媽咪吳綺莉幫拖,佢同太太坐的士返吳綺莉大坑住所,吳綺莉欣然開門畀佢哋入屋,仲幫佢哋畀埋的士錢。

今日中午約1時15分,吳綺莉揸車離開住所,卓林與Andi都坐喺車上,座駕抵達跑馬地後,吳綺莉於恒生銀行落車,獨自入咗銀行處理事項,之後再上車會合卓林,並開車到另一街口的中國銀行門口停車。

今次到卓林同Andi落車,佢哋兩個入咗中銀疑似入錢,完事後齊上車,吳綺莉開車回住所。三人離開住所後,到兩間銀行全程約花了大半小時。

期間問到卓林媽咪是否攞錢畀佢交租?佢不作回應,而吳綺莉被問到是否畀錢阿女?阿女係咪返去住?佢都冇答。

到家後,卓林與Andi先行落車,待吳綺莉泊車後才一起上樓,期間卓林更攞電話反拍記者。

(on.cc)