劉青雲日前喺九龍塘出席活動,原來今年7月係青雲同太太郭藹明結婚20周年,青雲喺台上話冇特別慶祝,但係會好好珍惜,20年唔係簡單嘅時間。

 

講到慶祝活動,青雲話:「我哋同啲朋友食餐飯慶祝吓,不過時間過得真係好快,我一啲都唔覺得過咗咁多年,有冇初戀感覺?咁又冇,真係唔覺得。」唔知會唔會送一份大禮物畀老婆?青雲就話:「城市人嘅嘢,見到鍾意又買得嘅嘢,已經買咗喇,唔會等乜嘢特別日子先送。就算係特別日子,買唔起就係買唔起。不過聖誕節就唔同,周圍都減價,可以去吓shopping,但係我未諗送乜嘢聖誕禮物,啱啱先拍完戲,唔一定要禮物,但係一定會有聖誕卡。」

之後大家又問喺張卡寫啲乜?青雲笑笑口話:「簽個名囉,張卡上面都印咗嘢。」再問佢會唔會寫I love you?佢就話:「哎呀!o依家啲男人真係惡做!」

古天樂今年入圍「叱吒我最喜愛男歌手五強」,青雲就話:「吓?古仔唱歌,好呀,多元化發展當然好,不過要注重身體。我喺偶然嘅機會下,好似係有聽過佢唱歌,我覺得都OK㗎。」唔知有冇覺得古仔唔做歌手好嘥?佢就話:「嘥咗我囉,但係最緊要係做自己鍾意嘅,唱歌都好,不如索性做歌手,留番啲嘢畀我哋撈吓!」之後再問會唔會鼓勵古仔去紅館開騷?青雲又笑笑口話:「佢咁醒目,古老闆自己識計,識得自己諗,係時候就會上。」

查實青雲曾經同古仔、張家輝喺電影合唱過,於是問佢哋會唔會搞番個組合?青雲即刻話:「唔好破壞樂壇喇,老實講,佢兩個係得,張家輝個樣都似係唱歌,我就唔得,冇天份!」佢仲話:「我點會唱歌呀,生日咪唱歌,哈哈,又要情話綿綿,你哋想點呀?o依家做男人做到好似考試咁,男人真係惡做。」

(Apple daily)