今次係佢首次同雯女鄧萃雯合作,同場仲有林德信。劇組更「加餸」為佢慶祝,而雯女就送上「抱抱」同蛋糕送上祝福,搞到佢好感性開心到眼濕濕。。。

出爐金馬獎最佳男配角袁富華(Ben),自得獎後都未停過,又要排舞台劇,呢日又為ViuTV新劇《婚內情》開工。今次係佢首次同雯女鄧萃雯合作,同場仲有林德信。劇組更「加餸」為Ben慶祝得獎,而雯女就送上「抱抱」同蛋糕,為Ben送上祝福,搞到Ben好感性開心到眼濕濕。

對於首次合作,雯女大讚Ben好專業,好放心同對方鬥戲:「佢係舞台劇演員,佢哋習慣會做足功課,嚟到現場見佢準備十足,我好放心同佢夾,會有唔同火花出嚟。」

而Ben就話︰「第一次同雯女合作,大家會去傾,我係舞台劇出身,好着重排練搵火花,搵最好嘅演出方法。(拍完有冇得放假?)冇啊,因為我要做舞台劇,拍完就要埋位閉關排戲,一直做落去。」

得獎後,Ben坦言未諗過加片酬,對於做主角,佢話隨緣:「緣份到自然有,其實之前都拍咗部電影係做主角,不過未上映,一切都係等緣份到,我本身好鍾意做戲,所以有冇咩獎都唔緊要,最緊要有戲俾我做。」

(Apple daily)