藝人馬德鐘(Joe)最近勁減廿磅,惹來整容疑雲:「有人問我係咪有病,有人話我整容,因為冇咗水腫,個雙眼皮深咗,呢個好難,整容醫生都整唔到。」原來佢成功瘦身全靠太太張筱蘭!

十幾年前她開始研究健康長壽問題,馬德鐘正是她的「白老鼠」,她說:「健康長壽,係實證研究,德鐘就係我嘅白老鼠,不但可減肥,身體和精神都有活力。(Joe試咗你嘅餐幾耐?)食咗差唔多六至八個月,遞進式改變,體重由高峰198磅減到依家178磅。」

她指老公每日進食三、四種新鮮水果和蔬菜:「淨係食蔬果會唔夠營養,人需要五十種營養素,唔可以食只有熱量和反式脂肪食品。」

她炮製的早午晚餐,早餐有聖女果、無花果、松籽、蘑菇加有機煎蛋;午餐有牛油果茅屋起司酸飽;晚上有鷹嘴豆及秋葵和番薯,飲用自磨豆漿,她還將磨出來的豆渣加菜做成豆渣餅當小吃,變化多端,賣相吸引。

問到如此食法馬德鐘莫非更長壽?她說:「係會少疾病、保持思維認知能力、情緒和睡眠都改善,其實佢病咗,照顧嘅人就會辛苦。」

張筱蘭正將過往發表的論文收輯成書,明年出版,而Joe的資料亦會收錄其中。

當然仲要配合運動啦!

早前她以成員身份,獲邀出席在悉尼舉行的國際百歲老人協會會議,與其他世界級專家交流討論健康長壽問題。

(on.cc)