楊卓娜(Lenna)係01年落選港姐,雖然星途未如妹妹楊怡咁出眾,但卻擁有美滿家庭,09年嫁俾「廣告燈箱大王」楊志翹,仲生埋囡囡舒然。由於丈夫早年喪妻,遺下兩個女舒婷同舒雅,後來卓娜成為兩位小朋友嘅手工藝老師,繼而認識現任老公,舒婷同舒雅可以話係父母嘅紅娘。

佢前日度過41歲生日,Sweet到爆嘅老公就為佢開咗個生日派對!

佢將派對相片放上微博分享,不過卓娜只係畀細女出鏡,其他親友就被emoji遮樣變成豬同狗,不過妹夫羅仲謙就憑住一身爆肌身形突圍而出,網民又估邊個先係楊怡,非常搞笑!

而現場就布滿色彩繽紛嘅氣球,除咗有Lenna英文字母氣球,仲有印有佢靚相嘅氣球,相當精緻。

卓娜仲冧爆晒鮮花,相信一定係老公送㗎喇,留言:「好開心的一個生日Party!多謝我的家人及朋友為我慶生!也謝謝大家的祝福!」

而卓娜嘅二女舒雅都有同呢位後母影合照,卓娜向來都話會視兩姊妹如親生女兒,一家人相處融洽。

網民除咗送上祝福,仲大讚佢Keep得好好,一啲都唔似41歲,仲好有少女味呀!

(綜合報道)