97年港姐季軍佘詩曼曾兩奪無綫頒獎禮視后,分別是2006年《鳳凰四重奏》及2014年《使徒行者》。但冇幾耐之後阿佘就正式離巢。

阿佘最近喺大陸宮鬥劇《延禧攻略》飾演奸角嫻妃再次爆紅,名利雙收,不過阿佘日前成為《魯豫有約一日行》嘉賓,佢接受訪問時自爆曾經因為14年前拍《金枝慾孽》,因為一個鏡頭,而搞到冇咗個月餅廣告。

依家無論喺中港台都爆紅嘅阿佘,最近接受大陸主持人魯豫訪問時提到接拍《延禧》,原來阿佘都曾經卻步,雖然佢同主持人魯豫指要接拍《延禧》時冇考慮到「會唔會紅」之類嘅現實問題,但佢就話當年因為喺《金枝慾孽》中,因為推黎姿落樓,而被廣告客嫌棄。

話說當年《金枝慾孽》第19集,阿佘演嘅爾淳假傳聖旨呃由黎姿飾演玉瑩小主去「暢音閣」講數,阿佘叫黎姿放過林保怡演嘅孫白颺,而且出口都唔夠,仲出手企圖推佢嘅死對頭黎姿落樓恐嚇佢添。

嗱,本來呢個只係成套劇嘅其中一部份,但就因為佢推黎姿呢一下出現咗喺宣傳片,阿佘話當時正傾緊一個月餅廣告,但因為個客睇到呢個鏡頭後覺得佢好衰,所以最後話:「我們不要她了」,就係咁,阿佘眼白白咁睇住個月餅廣告飛走咗!

阿佘話當刻自己就諗,原來個嚴重性會咁大,所以接《延禧》嗰陣都有諗過呢一點,不過佢之後就考慮到年代唔同咗,觀眾嘅諗法亦都應該有改變,所以最後都拍咗。

除咗諗奸角會影響形象外,阿佘亦透露因為拍《延禧》時自己正身處馬來西亞拍電影,所以若接拍《延禧》的話,佢就要馬拉、橫店兩邊飛足足五次咁多、又要將自己「撕開」兩邊去演繹角色,除此之外,當時又喺7月,橫店有成40幾度,要喺高溫下拍古裝的確好辛苦,再加上《延禧》中嘅台詞又係普通話,佢又將台詞譯返廣東話去演所以更困難。

而最重要嘅一點係,因為阿佘曾經喺13年炒車搞到頸椎移位,所以佢冇辦法可以戴住太重嘅頭飾,但好彩制作人于正表示《延禧》嘅髮髻好細,台詞亦可以配音解決,大家最後先睇到阿佘咁精采嘅演出咋!

另外,黎姿同阿佘喺《金枝慾孽》入面表現同樣亮眼,當年台慶一齊爭視后,當年有指台慶前夕佢哋原同為一美容產品活動任剪綵嘉賓,但黎姿突然劈價、主動提出減價,附帶條件係要單拖上陣。結果,黎姿成功撇甩阿佘做剪綵嘉賓。

(綜合報道/Apple daily)