關心妍(Jade)同老公楊長智結婚多年,婚後講到明話要生B,密密造人、甚至試盡各種偏方、秘方,例如用秘魯人參「馬卡」幫老公補腎、食牛肉就可以生女等等,更曾考慮人工受孕。

試足七年,最後佢哋終於成功自然受孕生咗個可愛囡囡楊榮心,自然就錫到佢燶啦!

不過兩夫妻並冇因為掛住湊囡囡而唔夠時間拍拖,一直以嚟都仲係咁Sweet!


日前仲一家三口出席苟芸慧婚禮。

昨日係Jade同老公結婚九周年嘅日子,佢一早就喺IG PO咗同老公頭貼頭合照,仲加哂心心放哂閃咁多謝老公,佢留言:「我們還有說不盡的話題,因為我們還在熱戀中❤感謝你愛你#happy9weddinganniversary!」結婚九年都仲係熱戀中,唔怪之得連網民都留言話好閃、Sweet爆!

Jade接受訪問話:「今年唔會有乜嘢特別慶祝,都係同朋友食吓飯,希望下個月有機會同老公出走幾日,過吓二人世界。」

問老公送咗乜嘢結婚周年禮物呢?Jade話禮物係佢一直想要嘅耳機:「我同老公講,唔使搞乜嘢花巧嘢,如果送禮物俾我,就買啲實用啲,所以提議買耳機,因為教唱歌同演出我都用得著。」

佢就同囡囡合作整咗兩個蛋糕,送俾老公:「一個係囡囡心心話送俾我同老公嘅,另一個就係我送俾老公嘅。」

Jade當年結婚話要生夠兩個,問佢今年會唔會努力追多個?佢就話依家太忙,囡囡又啱啱返學,加上佢又要忙慈善基金嘅嘢,所以要追都過多兩年先!

(綜合報道/Apple daily)