陳展鵬與單文柔在四季酒店舉行婚宴,場內播出一對新人所拍的MV,跟着展鵬唱出自己的歌曲《差半步》冧妻,並拖新娘子上台,令單文柔爆喊,不停用紙巾拭淚,他邊唱邊擁着對方,場面溫馨感動,唱畢兩人相擁!

展鵬表示:「呢首歌係太太好鍾意嘅歌,佢認識我嘅時候成日都會播呢首歌,不過都係一個藉口,係一個藉口去拍一個MV,希望呢份禮物永永遠遠留喺佢心裏面,呢個女主角係屬於你,thank you。」

而單文柔亦解釋:「因為喺我最失意最唔開心時,成日會播,跟住返嚟香港識咗佢!」

MV有錫錫。

婚宴場地佈置成叢林景,有好多綠色植物點綴,好似去咗熱帶地方一樣。一對新人蹺住手進場,接受親友們的祝福,佢哋喺台上合巹交杯後再切蛋糕,當然唔少得深情擁吻。

現場仲有播放一對新人拍攝婚紗照時嘅短片,展鵬喺台上感謝父母,而現場亦有無綫高層樂易玲等,及一班亞視舊同事,如袁文傑、陳煒、杜挺豪、梁浩楷,展鵬亦有趁機會多謝亞視同無綫多年來嘅栽培和照顧,場面溫馨。

(on.cc東網)