今年52歲的林利,年初爆出患直腸癌第二期末期,手術後幾日他還帶病上陣為音樂人黎小田演唱會做嘉賓,4月拍完無綫劇《鐵探》幾個月,近日又即刻為另一部新劇《殺手》開工,完全冇休息冇停過。昨日下午二時左右他拍攝一場打鬥戲,突然休克暈倒,因頭部落地撞穿了,無綫急送他入院縫了幾針,事後他已回家休養。

林利透過電話回覆東網,聲線明顯有點攰的他說:「啱啱喺醫院返嚟,今朝我凌晨4點出門口,返到公司就化妝,六點左右開始拍,去到下晝兩點我突然休克,佢哋Call白車送我去醫院,嗰幾分鐘我完全冇晒記憶,喺急症室半個鐘到先記得返嘢,因為個頭撼落地穿咗,流咗少少血,醫生幫我縫咗6針,之後做咗腦掃描,又照咗心電圖,但完全正常冇事,醫生主要話我休息不夠。」

林利指現時「塊面生返啲肉」。

他表示劇中他飾演殺手中的殺手,是武林高手,當時他跟一班殺手打鬥,陳豪雖然在場,但兩人沒有對打戲。無綫體諒他,這幾日都會讓他放假休息,他說:「最快下星期先開工,廿幾號我仲要去台灣拍外景,要拍成個月。」他指劇組一直都好照顧他,但明白不能遷就得太多。

他透露自從大病做完手術後,本應好好休息半年,因為元氣大傷,體力係差:「但我自己唔聽話,一路都冇停過。(做乜咁搏?)搏殺嘛,機會唔等人,而我最近演嘅角色都唔係輕嘅,好多動作又反派,用咗好多情緒,瞓得唔夠,始終大病過後,係要長時間調養吓身體,因為中氣都未復元。」他坦言完成《殺》劇拍攝後,他會慢慢減產。而《殺》監製陳維冠表示林利並沒有大礙,已經出院休息,他將會休息一段時間才到台灣開工。

(on.cc東網)