韋家雄曾經歷過一段失敗婚姻,育有一子,一度令佢對愛情失去信心。不過,今年初韋家雄再度遇上心中所愛,與「銀行之花」Keynes可謂一拍即合,拍拖幾個月已訂婚盟。

今日係53歲韋家雄的大喜日子,與比他年輕近廿年的女友鄧楚雅(Keynes)拉埋天窗,大叔的愛修成正果,真係恭喜恭喜!

兄弟姊妹團陣容強大。

今朝9時多韋家雄就率領一班兄弟團出發去接新娘,其中一名兄弟易智遠出發前上載照片,照片背景所見,韋家雄單身的最後一夜應該在酒店度過。

今早一班兄弟團就在太子帝京酒店會合出發,而佢嘅兄弟團同韋家雄一樣都係綠葉出身,包括有楊明、戴耀明、李啓傑、葉暐、易智遠等。

早上十時,韋家雄一身紅金中式禮服喺酒店大堂現身,樣子好醒神,但佢就自爆噚晚緊張到瞓唔著,佢話﹕「心情好緊張呀,噚晚已經成晚瞓唔著,但ok嘅,好彩安排好晒,好多好朋友幫手。」

家雄話今日嘅兄弟團係貴精不貴多,問到準備好開門利是未?佢話﹕「準備好喇,但盡量講數啦,一陣上啲高難度動作就交畀大家,但我都知自己都要做啲嘅。」咁愛的宣言冇得假手於人,咁準備好講詞未?家雄一副冧樣話﹕「只係三個字啫『I Love Her』。」

他透露有做足傳統儀式,又有玩新郎環節,他笑言:「我會記住呢鑊!我哋要跳舞、又要揈波同埋食芥辣,仲要答啲好難嘅問題,都答錯咗啲。(有冇講愛的宣言?)有,我講得好認真,都係嗰三個字,I Love You。」

Keynes表示十分滿意,兩人互給對方110分。家雄稱之後會去泰國探太太的親戚兼度蜜月,再去台灣,一直休息至十月尾。

問新娘子Keynes滿唔滿意呢個老公呢?佢輕聲說:「滿意。」俾幾分?「110分!」韋家雄又搭嘴:「嘩!唔使咁多,我俾番10分你啦,大家滿分,100分啦!」

兩人仲好合作,「自動波」錫足三十秒俾大家影。新娘子一身金器,目測起碼四、五對龍鳳鈪,一派喜氣。

 

 

 

 

(綜合報道 / on.cc / apple daily)