金牌監製梅小青及劉家豪嘅律師仔仔劉鎮然(Alfred)2014年同女友胡佩儀(May)拉埋天窗,當時佢哋已經露咗口風恨抱孫,近日終於有好消息,呢個驚喜仲係打孖上,真係恭喜晒!

凌晨時段梅小青喺社交網甫咗幾張相,見到佢同老公勁開心,其中一張梅小青雙手抱頭個樣興奮得嚟又好似有啲唔相信咁,佢留言叫大家估吓佢哋做乜咁開心!隔咗唔夠半個鐘佢就開估:「我哋開心是因爲:一家四口就來變成一家六口了!上天待我真的真的好!感恩中。」

據知十一月梅小青就可以親手抱孫,仲係一手抱一個,唔怪得之佢會開心到咁樣啦!唔少人好似黎燕珊同鍾淑慧都有留言恭喜佢哋榮升爺爺嫲嫲。

(on.cc東網)