新一屆香港小姐,你又記唔記得佢哋個名呢?講到最最最有代表性嘅香港小姐,莫過於港姐中嘅港姐嘅朱玲玲喇!原來早前係佢登「陸」60歲生日。

同樣係港姐、慧妍雅集成員嘅王愛倫,為朱玲玲及本月2號生日嘅曹敏莉慶祝,王愛倫喺ig貼咗噚晚聚會嘅相,仲留言︰「Happy birthday to my friends Mandy and Loletta, thanks for PHILIP’s kind arrangement of the wonderful dinner with lovely ms hk cake.」至於個蛋糕仲整咗個食得嘅港姐后冠上去,真係好有心思。

已經做咗嫲嫲嘅朱玲玲着咗套類似韓服嘅服裝,簡簡單單幾乎素顏嘅打扮,睇落都唔係好似60歲。至於曹敏莉都係9月星辰,36歲生日嘅佢,同朱玲玲及王愛倫,點解會咁friend,因為大家都係港姐,同埋係慧妍雅集嘅骨幹成員,依家曹敏莉擔任個會嘅信託委員會副主席,而王愛倫係呢個委員會成員之一,至於朱玲玲當然係神枱級嘅永遠榮譽會長,所以佢哋成為咗忘年之交。

曹敏莉獲同屆港姐嘅楊洛婷、戚黛黛提早慶生。

(蘋果日報)