至於Sammi仲鬼馬,佢係Ig度貼相,再拍多條片繼續介紹︰「呢個就係攝影師,(影住甘比)呢個係攝影師嘅助手,(再影住自己)呢個係攝影師助手阿媽,就係咁喇!」

噚日劉太甘比(陳凱韻)同好姊妹Sammi(鄭秀文),一齊去咗灣仔,為紅姑(鍾楚紅)開嘅攝影展撐場,紅姑唔係第一次開攝影展,4年前紅姑先後喺香港同台灣都有開過攝影展,而今次以「Cherie Chung Pour Studio 22」。甘比喺佢Ig度貼咗三人合照相,留言︰「撐紅姑~又有攝影展啦!」

至於Sammi仲鬼馬,佢係Ig度貼相,留言︰「哈哈!紅姑九幅作品,三條女士 好快睇完。好省時!」之後仲貼咗條片,片中紅姑先講︰「MAISON XXII」之後Sammi搞笑咁話︰「嚟呢度可以睇到呢9張佳作,其實一分鐘睇完,好值得嚟睇,一啲都唔嘥時間,仲有好多嘢買呢度,有日用品、食物、文具,暫時冇我張唱片買,哈哈哈,拜拜!」

之後Sammi再拍多條片繞場一周,片中Sammi再次hard sell話︰「我哋呢撐紅姑,一個小小嘅真係好小,得9張作品嘅作品展,雖然好少得9張,大家睇吓,一眼睇晒,其實都唔使嚟,(紅姑作狀打Sammi)哈哈哈,睇完,三秒就睇完,紅姑好鍾意影相,成日去旅行。」紅姑接住話︰「依度係影番嚟嘅法國南。」Sammi繼續介紹︰「呢個就係攝影師,(影住甘比)呢個係攝影師嘅助手,(再影住自己)呢個係攝影師助手阿媽,就係咁喇!大家有興趣就嚟到灣仔聖佛蘭士街。」

而Sammi再喺段片再留言︰「紅姑的事,一定撐!今日三個人一起去睇她的攝影作品。紅姑在一間品味小店展出了小小作品,紅姑很喜愛藝術,也真心𢤦得藝術。她攝影很有sense, mi就完全冇sense 小店內都有花有朱古力有生活用品買有小小食物買有碗碟買,不妨行吓!」

(蘋果日報)