「但佢認為條路唔啱行,我哋為呢件事拗咗足足4年,佢都唔接受呢件事,唔接受冇辦法啦,已經變咗一個事業與家庭嘅抉擇。」

李道洪經歷了兩段婚姻,現任太太結婚18年,有兩子,分別是18歲大仔Winston和14歲的細仔Victor。前妻,是梁小玲、無綫「御用癲婆」趙希洛的母親。

「陳年往事啦喎,40幾年前往事。我哋係好早期一段婚姻,可以話誤會而結合,了解而分手。麗的時間認識,跟住我哋拍檔,跟住我哋唔合就離婚,前後都有4年。74年結婚,78年離婚。」

退出娛樂圈數十年的梁小玲,是李道洪麗的訓練班師姐,演情婦、二奶角色最入型入格,包括《親情》和《京華春夢》。但李道洪透露,梁小玲早早已厭倦娛樂圈這個花花世界。

「佢好厭惡影視工作,冇人知㗎,佢一路喺電視做咗好多年,但其實佢係一個好純樸嘅人,佢唔慣影視圈嘅虛偽圓滑,我哋影視圈鍾意埋堆,佢又唔埋堆,佢係一個好獨立個體,唔鍾意太多應酬,而我係幾喜歡埋㗎,譬如同發仔(周潤發),我哋收工會一齊去宵夜,佢就認為收工應該返屋企,做乜你11點收工,1點先返嚟?」

「第二,佢認為一個男人做演員係冇出息。我讀書係讀理料,跟住去台灣讀土木工程,佢認為我應該做工程師,但香港環境好特殊,你台灣讀書,香港係攞唔到牌做工程師,我認為冇出息,我認為電視條路啱行,但佢認為條路唔啱行,我哋為呢件事拗咗足足4年,拗到我喺台灣大賣座紅咗,佢都唔接受呢件事,唔接受冇辦法啦,已經變咗一個事業與家庭嘅抉擇。」

跟前妻再見亦是朋友?李道洪說:「再見就打吓招呼,點吓頭,因為雙方有唔同家庭,唔希望有另外一個誤會,只有《歡樂今宵》聚餐大家見一見啦。」

99年尾,李道洪娶了年輕21歲的上海姑娘,他感激太太支持自己演藝事業:「但到咗我呢個時間年紀漸大,我希望有家庭,所以由我大仔出世之後,我就減少工作量。」

梁小玲再婚後生下女兒趙嘉迪,女兒07年選港姐,正式入行後改名趙希洛。

(蘋果日報)