2018年過咗大半,天后鄭秀文終於有新歌派台,新歌《千年如一日》由高皓正作曲作詞,相信歌迷都等咗好耐喇,不過近日呢首《千年如一日》就捲入咗抄襲風波。

香港音樂人Jim Ling噚日就喺社交網站發文話:「我唔介意呢首歌最後冇搵我編曲,但係點解要抄我個編曲而唔搵我編呢?!」指摘鄭秀文新作抄襲,《蘋果》搵到佢了解,佢話其實呢首歌早喺2013年高皓正就已經搵咗佢編曲,佢話當日高皓正都有表示將來可能會將首歌賣出去搵歌手唱,最後呢首歌就落咗鄭秀文手上。

Jim話:「阿正都有同我講過,首歌搵咗Johnny Yim編曲,但Sammi聽完後都想要番本來編曲多啲,佢話佢都有提議Sammi,搵番我修改,但Sammi同Johnny合作開。」

Jim話本來佢都唔介意,但近日就發現咗呢首歌嘅編曲,同佢個極為相似,佢又話已經好多行內人聽過,都覺得佢可以追討!Jim話噚日有同東亞A&R同事短訊聯絡過,表明想追討番,要加名等等,但對方未有實質回覆,只反問咗佢一句:「你係咪決定要咁做」就冇其他回應喇!今日《蘋果》亦搵過Sammi唱片公司東亞,對方回應話:「公司已知悉事件,正了解及處理中!」

(蘋果日報)