昨晚微博上忽然有網民瘋傳一條片,聲稱是張衞健在北京朝陽區吸毒被捕,片中只見張衞健穿上應是登台服飾,在一班疑是公安護送下匆匆離開。片中見張衞健雙手放在前,神情凝重。

今晚微博上忽然有網民瘋傳一條片,聲稱是張衞健在北京朝陽區吸毒被捕(微博圖片)

 

朝陽警方未發佈任何證實資訊,不過張衛健國際歌影迷會微博就貼上一張署名是「張衞健工作室」本月19日發出之聲明,指摘事件屬網民造謠。

聲明全文

現身在香港的張衞健,晚上接受電話訪問表示:「流㗎!前兩日喺湖南做騷,因為好多fans圍住,保安維持秩序,保護我入場同離開。」

張衞健表示昨日已經知有人擺片上網,問到被傳吸毒被捕,可覺得有人立心不良?他滿不在乎謂:「網上嘢不能盡信,冇嘢好嬲,真係冇畀人拉,呢啲冇得瞞,我今日都發咗微博話搬屋。」

張衞健表示昨日已經知有人擺片上網:「我今日都發咗微博話搬屋。」 (微博圖片)

有冇嚇親媽咪?張衞健笑稱:「梗唔會!日頭先見完佢,我搬去媽咪附近住,仲問佢有冇公仔麵,問佢攞咗麵醫肚。」

翻查資料,張衞健前日(18日)在湖南新化出席《中國巡迴演講幸福來敲門——明星演唱會》,有份演出的除有張衞健外,還有陳雅倫、元彪、陶大宇、劉錫明等等。陳雅倫晚上回覆《蘋果》稱,當日她是負責下午演出部份,張衞健負責夜晚,她說:「嗰啲保安嚟㗎,保護健仔出場。邊係拉?」

 

 

(apple daily)