薛家燕二仔石耀庭(Jackson)今日小登科,娶新抱Zoe,今晚喺尖沙嘴洲際酒店舉行婚宴,擺咗53圍,喺眾賓客入座後,一對新人喺台上同賓客打招呼,然後新郎攞住個手機嚟讀稿致辭,佢對住任職老師嘅老婆話:「能夠娶到係我福氣,呢一年嚟辛苦你啦!又要返學,又要籌備婚禮,一定好辛苦,不過我哋經歷到,撐咗過去,我相信以後冇嘢難到我哋,多謝你愛錫我同保護我,我會永遠照顧你、保護你,俾你有最大嘅幸福!I Love You!」

結婚蛋糕成個人咁高。

Jackson數度因為感觸落淚而講唔到落去,Zoe就幫老公印眼淚,Jackson又感激外父外母、公公、婆婆咁辛苦養育一個咁靚、咁善良又細心嘅Zoe。Jackson又答謝媽咪,佢話:「我自細喺單親家庭長大,媽咪好辛苦帶住我哋三個仔女,佢好努力工作,多謝媽咪!」致辭完畢,一對新人同台下家燕姐都忍唔住爆喊。

Jackson致辭落到數淚,Zoe即為老公印眼淚。
又喊一次。

呢身六子連環金豬頸鏈,就明晒奶奶嘅心意啦。

 

而「七公主」中有五位到賀,包括蕭芳芳、陳寶珠、馮素波、沈之華及王愛明,她們更齊齊排排坐飲新抱茶,派利是給一對新人。蕭芳芳接受訪問時謂:「好開心,今日我哋一齊嚟飲新抱茶。」陳寶珠亦表示相當開心,開心到前一晚瞓唔着,笑言做姨媽,此時馮素波即謂:「唔係呀!我哋做奶奶呀!我哋升咗級嘞!我哋由佢出世睇住Jackson大,最大分別係以前好肥,依家好瘦。(送乜畀一對新人?)唔講你知,等家燕講!」眾人祝福一對新人百年好合、永遠恩愛、一家和睦等!問到有否叫新人快些生小朋友?陳寶珠謂:「咁你哋要問家燕!」

王愛明(左起)、蕭芳芳、陳寶珠、沈之華、馮素波

有「新抱」茶飲!

新任奶奶家燕姐台上致辭,佢一度開心到講錯係自己結婚咁,佢話:「好多謝大家百忙中嚟出席我今日……我個仔個婚禮。」連家燕姐都忍唔笑,佢話:「對唔住,我呢排成日噏錯。」

佢多謝朋友由遠道返嚟,再講到獨力養育三位子女嘅辛酸:「在場的朋友都是看著我的子女長大,20多年前當時子女還小,大家都知道那段日子,我的路不平坦,曾擔心過如何養大他們、擔心過不知自己能紅多久,怕一、兩年後無工作,好大壓力。幸好我有衝勁,好肯去做,而3個子女好乖、好聽話,最難得感恩在場的影視界朋友都是我的恩人,沒你們的支持和愛戴,我3個子女不會有順風順水的路去走,謝謝無綫、新城電台和贊助商的支持,我囝囝的學費全部他們付,Jackson可以去留學,學成歸來,今日事業有成,還可以成家立室,我真的很開心。」家燕姐話好彩仔女生性聽話:「在座好多影視界朋友都係我恩人,冇你哋支持,冇你哋愛戴,我三個仔女唔會有咁順風順水嘅路去行。」

 

 

 

 

(apple daily / mingpao)