「人在,人情在。」這是他在娛樂圈27年最深體會。轉行做司機,一做20年。由藝人轉做司機,初時確難以走出心理關口:「返工唔係好同人講嘢,唔知人哋點睇,後尾同成班同事相處耐咗、熟絡咗就冇嘢。」


黃宗賜這個名字,大家未必記得,但若說是陳立品孫兒,相信觀眾應該有印象。人稱「品姨」的資深演員陳立品,在電影和電視演過無數小人物角色,曾是香港人「老友記」,黃宗賜5、6歲便是嫲嫲帶入行,拍過《小太陽》、《幻海奇情》和《風雲》等劇,是第一代電視童星,亦是無綫御用反叛青年,當中代表作,包括78年鄭少秋版《倚天屠龍記》飾演童年張無忌,及84年《新紥師兄》與梁朝偉老友「喪昌」。


可惜,品姨90年病逝後,黃宗賜被無綫投閒置散,所演閒角越做越閒,最後,在娛樂圈消聲匿跡。原來,消失21年的黃宗賜,98年已經轉行做司機,應驗他在《新紥師兄》退出警校後轉行做司機志向,戲如人生。53歲的黃宗賜,日前在其荔枝角band房接受《蘋果》專訪,由少年到中年,黃宗賜發福不少,額上火車軌,令他倍添滄桑感,驟眼看,很像何守信。


問97年離開無綫原因,黃宗賜說:「同其他同事一樣,都係合約條件唔啱,本來一個月10個騷,cut到我得番4個,同我簽一年,我計過數,如果一年之後佢唔同我簽,我長期服務金就會少咗百分之60,所以我迫於無奈唔簽。」


東家唔打打西家,黃宗賜飛到馬來西亞拍劇,可惜一場金融風暴令大馬獨立製作公司相繼倒閉,黃宗賜唯有返港搞小生意賣電話零件,結果又蝕本一舖清袋,前路茫茫。「問朋友有乜好做,佢問介唔介意揸車,我話好,冇所謂,於是去做一啲政府外判工作,做咗好多年之後,重加入咗政府部門。」就這樣,黃宗賜轉行司機,一做20年。由藝人轉做司機,黃宗賜初時確難以走出心理關口:「返工唔係好同人講嘢,唔知人哋點睇,後尾同成班同事相處耐咗、熟絡咗就冇嘢。」


黃宗賜指所有同事都認得他是藝人,還問他會否開兩日工便返去拍戲。黃宗賜笑說:「其實份工都好輕鬆,返工時間固定,收入固定,後尾仲多過喺TVB㖭,我臨走時都係萬幾蚊人工。」品姨在生時,無綫對黃宗賜不薄,有不少角色發揮,直至90年品姨過身後,黃宗賜察覺電視台對他已大不如前:「人在,人情在。我阿嫲過身之後仲對我好好嘅,都有,但唔係公司,到傾合約嗰時有啲覺得唔同咗。可能我做得唔好,公司覺得我冇乜表現,所以開出嘅條件冇以前咁好。我咪唔做囉!」


可有興趣復出再做幕前?黃宗賜苦笑:「冇啦,自己都唔係好適應。我o依家生活好靜,入番呢個圈嘅話好似要面對好多人。」


黃宗賜自問不是演戲發燒友,不再適應幕前生活,更不習慣被人亂批評。他說偶然看到有網民說他吸毒甚至做馬伕:「o依家有互聯網,你做成點都會畀人批評,當然有好有唔好,有時又會無端端俾人攞出嚟研究討論,屈你都有,譬如話我吸毒,全部虛構出嚟,講到似層層,如果變番做公眾人物,要接受好多呢啲批評。」如今有固定工作穩定收入,09年與圈外女友Carmen結婚後一直過着二人世界,閒時到Band房與友人夾band jam歌,對曾經過住五光十色生活的黃宗賜來說,簡單便是快樂。

(蘋果日報)