日前《深宮計》首播,原本話明係同大陸網站騰訊合作同步播,點知有大陸網民就投訴,等到第一集播完都仲未有得睇,有人甚至話為咗套劇俾錢做會員,點知就願望落空,甚至留言話:「迫我開了翡翠台直播,體驗並不好。騰訊你這是怎麼了?」

​有人估計騰訊冇得播,可能係未交齊文件過唔到審批,但其實之前范冰冰主演嘅《巴清傳》,就曾傳出歪曲歷史,服飾甚至照搬平安時代造型而過唔到審批嘅事件。

無綫節目及製作副總經理杜之克昨晚出席節目首播活動時都有講番,拎審批嘅時間比預期長咗啲,不過佢話唔熟悉大陸運作,唔知暫時預到啲咩阻礙。

(蘋果日報)