夏韶聲(Danny Summer)同鄧建明(Joey)今日喺商台接受訪問,宣傳佢哋下月聯同黃貫中、單立文及恭碩良舉行嘅Hong Kong Band《搖滾大俠奏》演唱會,Joey指呢個演唱會猶如明星足球隊一樣,有齊前鋒、中場、後衛,隊員無懈可擊,笑指做龍門嘅佢根本唔使接波。

Danny透露因為呢個演唱會而犧牲咗一部電影,不過佢認為呢件事喺香港樂壇歷史上發生,所以係應該做。Joey就話各位樂手都係佢鍾意,佢笑住話:「我16歲嗰陣,接到夏韶聲電話,『o靚仔,幫我唱和音!』,我夾band係聽夏韶聲嘅歌,我亦都有買佢嘅唱片。」Danny即話:「我冇咁叫你呀?!我嘅意思係後生呀!」位位都係大哥,開會時有冇火花四濺?Danny話:「冇大哥,邊個敢認,我諗我哋係朋友多過你係大我係細,雖然我年資最長,6幾年就入行,但咁又點,大家都過10幾年,冇話大唔大哥,大家夾埋炒碟好餸。」

夏韶聲

講到演唱會門票,Danny坦言同朋友搞到冇朋友做:「好煩,第一時間打嚟,我邊得閒,有一個話『如果唔幫手,朋友都冇得做。』咁唔好做囉,點解成日同我攞飛,佢嘅口氣係你要買埋畀佢,你當我傻㗎,呢個係商業演唱會,當紅館坐8000人,不如我買7500張飛,派晒畀你哋好唔好呀,唔可以咁樣對待我哋啲artist,或者o依家我講得過份咗,但佢哋仲過份過我。」

夏韶聲今日同鄧建明到商台接受訪問。

 

 

 

(apple daily)