一本舊相簿,為母兼父職嘅薛家燕喚起唔少辛酸記憶。

家燕姐看着三名子女童年照,眨眼間佢哋都投身社會工作,相中肥仔石耀庭(Jackson)今年已31歲,下月11日將成家立室,迎娶25歲女友陳素怡(Zoe),家燕姐就升呢奶奶。68歲嘅家燕姐,9歲當童星,於60年代竄紅,更是七公主之一,84年嫁給圈外生意人石保慶,育有三名子女,婚後相夫教子,淡出幕前,可是老公卻拋妻棄子。家燕姐95年離婚,全家經濟出問題,家燕姐被迫復出,孭起頭家。絕處逢生,家燕姐參演無綫劇集《真情》,「好姨」一角入屋親民,為佢大翻身,一家四口拮据生活從此改寫。

看着昔日發黃舊照,家燕姐慨嘆:「時間過得好快,我初初仲諗點養大佢哋,要供書教學,讀完大學,o依家成家立室,漫長時間,係有經歷艱苦,但當中也有快樂嘅時光,養大仔女唔簡單,可能因為單親家庭,佢哋亦特別懂事,珍惜我畀佢哋嘅愛。」

「囝囝今次結婚,佢哋要有自己屋企,佢哋商量話係咪要住喺媽咪隔籬,永遠照顧我。佢哋成日叫我唔好咁辛苦,有乜事可搵佢哋,佢哋o依家有自己事業,呢樣令我好感動。我年紀大,日後真係可能要人照顧,但我只識掛住衝,不過仔女有珍惜同體諒,真係令我好安慰、好難得。」家燕姐不但有三名孝順子女,準新抱Zoe都愛屋及烏,佢話:「怕我冬天拍嘢凍,佢會買保暖內衣俾我,佢話件衫唔厚,着出嚟貼身唔怕肥,外景唔怕凍,我覺好touching,感覺到囝囝錫我,連Zoe都幫手照顧埋佢媽咪。」

家燕姐講着單親媽媽捱大子女辛酸:「冇就呃你,我有偷偷喊,唔敢喺仔女面前喊,喺佢哋面前喊做唔到乜,反而影響佢哋。記得有一年母親節,係我離婚復出第二年,當時好多嘢做,母親節要跑5個活動,做埋大騷,其實呢個節日應該係同仔女度過,我根本冇時間 ,嗰晚返到屋企11點幾,我準備落妝,點知9歲大女帶住細佬妹,矇住眼拎玫瑰花入嚟,同我講『媽咪,母親節快樂』,我都冇同佢哋過母親節,但佢哋記住媽咪返嚟要同我過,仲買咗紙包蛋糕,我當時好開心,但個心同時好酸。我攬完佢哋,就叫佢哋返房瞓,第日返學,我就暱喺廁所爆喊,嗰日我好辛苦,紅先咁多job,但我卻疏忽咗仔女 ,所以佢哋之後就用燕窩煮甜品。」

家燕姐工作雖忙,但仍然對子女管教嚴格:「我要佢哋做好自己,我好擔心佢哋學業,會鬧會打㗎!細個佢哋唔識分對與錯,我會嚴啲,母兼父職唔簡單。」家燕姐喺Jackson小學時,眼見佢為食變肥仔,更安排佢參加清秀班,強制減肥,佢話有一晚凌晨見囝囝入房偷叮小籠包,佢都心痛,結果未有沒收,仲叫囝囝快吃完去瞓覺。

崎嶇人生,家燕姐全部記憶猶新,「好安慰,我哋人生經歷,反而令仔女學會凡事愛護、感恩。」講到呢度,家燕姐開始眼濕濕,拎紙巾輕抹眼角。Jackson體諒媽咪:「佢工作幾忙都成日掛住我哋,會打電話返嚟,我哋三兄妹,希望做好自己,等媽咪可以享多啲福。媽咪好偉大,太勁。」家燕姐知道囝囝好懂事,當年送佢去美國三藩巿入大學寄宿,母子離別,Jackson未有回望,家燕姐話:「原來佢唔想我睇到佢喊,我上到飛機又喊。」

養兒方知父母恩,家燕姐話:「天下所有母親都係咁,都會愛自己子女,係點去表達、關注同珍惜。」經歷過婚姻失敗嘅家燕姐,看着囝囝結婚,進入人生第二階段,佢不忘勉勵:「希望佢哋恩恩愛愛,甜甜蜜蜜,永結同心,互相扶持、忍耐。有時唔知大家生活習慣,婚後一齊住要互相適應磨合,男仔要當起個家,一定要負責任,錫老婆,呢個好緊要。女嘅就要幫先生,分享愛,每個人都有佢優點、缺點,要學識搵對方優點,包容缺點,互相體諒,做到呢幾樣就會夫妻和睦。」

至於抱孫,家燕姐坦言唔心急:「唔想畀佢哋壓力,佢哋鍾意幾時有BB都得,我都好長命,唔使擔心,順其自然。」家燕姐直認初見Zoe已嗒糖,認定佢係未來新抱:「我一望Zoe就覺得係呢個,佢好乖好懂事,爹哋媽咪教得好,佢同Jackson相處我好放心。Zoe又nice又靚,知我工作忙,平日會親手煲啲湯水畀我。屋企嚟緊多咗個新成員,大家互相扶持關愛。」距離Jackson大日子尚有一個月,家燕姐話半年前開始,全家變「無飯家庭」,齊齊減肥,希望囝囝大婚當日,全家都靚靚現身。

(蘋果日報)