拍拖以來一直保密,連父母家人都不知情,直至上星期五,兩人忽然一次過在fb宣佈拍拖兼訂婚的消息,令人嘩然。「我大佢咁多年,成功機會係好低,唯一可以做嘅,係FB messenger傾吓偈,有機會就約佢出嚟飲吓茶。佢鍾意食嘢。」

女人觸覺好敏銳,未幾Virginia察覺到海報師阮大勇有追求之意,反應是即刻落閘:「因為佢年紀,我唔想嚇到人心臟病,因為我脾氣唔係咁好,所以我開始feel到佢有少少鍾意我嘅時候,我好抗拒,佢講乜我就話唔得、唔得閒,由好好朋友變咗乜都no,令佢好唔開心。」

「攤牌」後第二個,即去年7月5日,是Virginia的45歲生日,阮老師嘗試再約對方食飯見面,一約就約了兩個月,直至9月9日,Virginia終肯食飯見面。究竟這兩個月是如何打動Virginia?又係facebook,仲玩埋instagram。原來阮老師不停在Virginia社交網俾like俾反應,打動女方,首肯相約見面。阮老師說:「我係朝早講早晨,夜晚請安。我一路堅持,佢fb post啲嘢出嚟,我梗係like啦。」

Virginia就說:「最令我感動係,佢其實唔識instagram,但佢開咗個ig,like我啲相又留言。我覺得不如做番朋友啦,我唔想傷害個長輩。」當日飯局上,從來冇教過學生嘅阮老師,為咗接近Virginia而主動話要教Virginia畫畫,他說得坦白:「我從來唔教人,因為我真係唔識教人,我係為咗接近佢,但佢一直話no。」

阮老師讚Virginia有藝術天份,喺阮大勇遊說下,Virginia終於成為阮老師第一位徒弟,兩個人周末周日在維園公園畫畫。畫畫過程中,Virginia感到阮老師的真誠。今年1月,兩人跟一位女性朋友入赤柱玩,Virginia見到現今「海報師」畫廊前址,環境很漂亮,阮大勇就決定租落嚟開畫廊,同Virginia一齊落手落佈置。開畫室主要也是為了追求Virginia?阮老師笑笑口承認:「好大部份都係……」

雙方家人有冇反對?Virginia說不知道,因為父母早已離婚,且自己與雙親關係好疏離,在公佈婚訊後,媽咪只在fb給了一個like。當阮老師向Virginia父親「提親」的時候,女方父親只回覆謂很忙,不方便聊電話講,並謂稍後「約出嚟見面傾」,不過之後一直未再聯絡。Virginia承認:「有少少先斬後奏,因為如果我地向所有人請示,所有人都會反對,冇人會贊成。」至於阮老師女兒,與Virginia同齡,她又是否贊成?阮老師說:「佢初初同Virginia好傾得,不過後來佢知道我要結婚,佢都話:『哎呀,爸爸你真係咁樣……』佢都有啲顧慮,做女有咁嘅反應係好正常,佢話你咁大年紀,會唔會俾個女仔呃呀?我估佢有咁想法,我希望佢慢慢了解多啲啦。」

婚禮,兩人決定不擺酒,咩都唔搞,阮老師坦言Virginia不太想見他的朋友。Virginia就說:「我唔鍾意人哋指指點點,我覺得好多人好錫佢,成日覺得我係一個壞女人,唔知謀住佢啲乜嘢,所以你對我品性唔了解就唔好埋嚟批評我啦,因為我會覺得好委屈嘅。」

說到這裡,Virginia已忍不住眼淚:「我真係俾佢(阮大勇)真誠感動0架嘛,點解啲人覺得我係貪佢錢?世俗人眼光就係覺得一個後生……」阮老師即安慰她:「我係畫畫佬,冇可能係有錢佬,我又唔係畢加索。我又冇做房地產投資……我覺得佢為我犧牲好大,壓力好大,我壓力冇佢咁大,所以我盡我力量,對佢一日好過一日。」

曾有一段不愉快婚姻的Virginia說,離婚後曾想過不再拍拖:「佢(阮大勇)冇做啲嘩眾取寵嘅嘢,好低調,令我好舒服,冇海枯石瀾,反而令我好平靜,呢個人可以信賴,同埋我望住佢,其實可以過廿年卅年。」是否因為缺乏父愛,才愛上阮老師?Virginia說:「係嘅,我承認嘅,佢可以填補到我心靈。有時好似我爸爸關心我支持我,因為由細到大,我爹哋媽咪從來冇讚過我,我係缺乏家庭溫暖,所以識咗佢之後好平靜,呢個世界我乜都唔驚,我唔相信愛,但我相信佢個人就得啦。」然後Virginia望一望阮大勇:「佢成日話,你點知你唔會死得早過我?點解我哋唔好好珍惜呢十年或者廿年呢?其實佢堅勇敢0架!」

(蘋果日報)