「細龜」黃一山拍過《逃學威龍》、《九品芝麻官》等經典電影,喺90年代與吳孟達、「如花」李健仁等都係周星馳御用配角。但隨住星爺減產,細龜近年轉戰大陸拍微電影,一來可以密密做搵多啲,二來方便照顧患有先天腦白質退化症嘅大仔頌衡。

細龜與周星馳在《逃學威龍》有多場對手戲。

在《唐伯虎點秋香》,細龜同李家聲分別飾演華文同華武。

日前下午二時許,細龜獨自到九龍眼科醫院睇普通門診,佢喺治療房逗留約20分鐘,之後再排隊預約下次覆診時間。等候其間,細龜不時低頭睇文件,佢要將啲文件擺到好近,視力似乎麻麻。

 

細龜黃一山

 

細龜戴住護目鏡同口罩離開醫院,被問到咩病…

 

細龜話﹕「人年紀大(53歲),可能我個樣仲幾青春,但裏面機件行咗幾十年,車都要換,但就人冇得換。」原來細龜患有白內障準備排期做手術,佢話﹕「滴咗眼藥水,所以瞳孔放大,唔可以接觸強光。其實我都有睇私家,但香港有眼科醫院,日日睇唔同症,我都想有多啲專業意見。」細龜有嘗試除護眼鏡俾記者影相,但抵唔住強光要立戴番,太太擔唔擔心?佢好樂天咁話﹕「冇,生老病死每個人都必須經歷,開心,有悲歡離合先叫人生。」

細龜一家住喺番禺,方便照顧患有先天性重病嘅大仔。

 

(Apple Daily)