去年底向拍拖三年的女友吳香倫求婚成功,這段「黃昏戀」修成正果,一對新人已定今年7月10號在香港擺喜酒宴請親朋。因為吳香倫第一次結婚關係,陳榮峻想給對方一個美好回憶,故以傳統的儀式結婚,事事做足。早前除買結婚戒指外,日前香倫再試中式裙褂,5月便會試婚紗,中西合璧的婚禮,令到香倫初嘗結婚甜蜜的滋味。

笑容一致,勁有夫妻相!

今次吳香倫將以「褂后」出嫁,當日她在未來老公陳榮峻陪同下試身。原來新娘的「褂后」為剛剛繡起的全新製成品,售價要6至7萬港元,而新郎的中式唐裝,亦相當醒神,香倫試褂時心情相當興奮,依據習俗,新娘的裙褂只能在結婚當日才能全套穿上,所以香倫當日只試穿上身服。

真係好細心,幫未來老婆整理頭髮!

陳榮峻受訪時,眼見未來老婆穿起「褂后」一副幸福模樣,都心感安慰,而他穿起唐裝禮服,則笑言:「我覺自己似個傻仔!(『褂后』好名貴?係呀,今次都好多謝贊助商,但其他嘅嘢,好似戒指我就拒絕贊助啦,因為戒指係對雙方承諾,要自己畀錢先有誠意!(女兒會出席喜宴?)會呀,阿女剛剛通知我請咗假,會喺新西蘭返嚟出席我哋婚禮。」

 

 

 

 

(on.cc)