97年參選港姐,與翁嘉穗、李明慧、佘詩曼同屆的劉綽琪,落選後加入娛樂圈,效力無綫,拍過好多劇集同主持,最為人印象深刻,是與劉天賜、陶傑主持《犀牛俱樂部》。

06年劉綽琪轉投亞視,兩年後離港返美進軍荷李活。2015年,劉綽琪在fb公佈婚訊,之後鮮有在社交網露面。原來這一兩年,劉綽琪過得並不容易。結婚一年,外籍丈夫患淋巴癌,而且病情漸嚴重,而劉綽琪婚前早已知,但仍堅持結婚,希望用愛去創造奇蹟,無奈事與願違。後來丈夫拒絕接受治療。劉綽琪亦尊重對方決定,還放下手頭工作,兩口子四處遊歷,陪丈夫走過人生最後一段日子。去年經歷了喪夫之痛的劉綽琪,原來爸爸最近亦都離開。劉綽琪覺得自己係好幸運嘅人,佢相信上天有安排。(ig圖片)劉綽琪嘅爸爸最近亦過咗身。(ig圖片)

《蘋果》向劉綽琪了解,她稱:「係,不過我唔想講係幾時嘅事,都係因為啲老人病!」又稱:「大家唔使擔心我,我好好,雖然我嘅屋企人離開咗,剩番我一個好似孤兒咁,不過上天會有晒安排,佢安排咗一班好好嘅朋友喺我身邊,而且我亦都習慣咗一個人,好享受呢份孤獨嘅感覺。」談到丈夫患病期間,劉綽琪仍決定結婚,珍惜餘下時光,不讓人生留有遺憾,她說:「係㗎,死亡係必需要面對嘅事,世事難料,我唔想到臨走嗰一刻,先發現自己原來有好多嘢都係未做,到咗嗰一刻後悔已經太遲,所以我覺得人一世物一世,乜嘢都要做咗先!」「其實我一直香港、美國兩邊走,我會返嚟香港探吓我契爺,我當然仲有興趣劇集同做主持工作,不過我都希望可以分享嘅工作,其實我覺得自己好幸運,仲可以得到咁多愛同關心,我為自己覺得自豪,好感恩可以擁有o依家嘅嘢,所以我都希望可以感染身邊嘅人,將啲幸福分享俾其他人。(ig圖片)

「我可以同大家講,我要經歷嘅嘢呢,我已經經歷過;唔需要經歷嘅呢,亦都經歷埋喇。我可以答大家,我係單身嘅,我都好enjoy單身生活,所以唔想拍拖住。但OK嘅,我對愛情仲有期望。」43歲的劉綽琪,自小父母離異,母親在她14歲那年自殺身亡。事發當日劉綽琪放學回家,抬頭發現母親冰冷的身體。多年前一個訪問,劉綽琪說:「冇可能被佢(陰霾)一世綁住自己,我唔想再被佢綁住,我唔想再喺過時過節時覺得好唔開心。」母親在生時,母女共度了很多快樂日子,例如去山頂觀光、海灘游水。劉綽琪話希望可以做多啲分享會。(ig圖片)

母親出事前一晚,兩母女更租了《秋天的童話》回家看——劉綽琪曾於訪問中說,有想過《秋天的童話》是一個hint,只是她當時沒有為意。劉爸爸在美國生活,妻子離世後,接劉綽琪到美國。劉綽琪說過:「爹哋性格好attractive,好玩得!佢好幽默、好Cute,所以好多女性都會好容易鍾意佢。我好proud of我爹哋,喺佢嗰個年代,喺上海大學畢業,然後一個人去美國發展,一啲都唔易。」雙親婚姻出了問題,劉綽琪肯定地說:「佢係一個好爸爸,好錫我同照顧我,依然當我係一個baby,好驚我冇錢用,哈哈!」

(蘋果日報)