紅菜頭降血壓之謎

紅菜頭有「歐洲靈芝」的美譽,近年更成為香港熱捧的天然健康食品之一,有指其營養豐富,更有抗癌、護肝、降血壓、減肥、補血、延緩衰老等妙用,講到咁勁,同仙丹有咩分別﹖

L1228_070_DSCF8243c

有人為求降血壓而日日食用紅菜頭製作的湯水、菜式、沙律兼濃縮紅菜頭汁,營養師坦言,血壓高成因多,單靠食紅菜頭絕對不能降血壓。

 

血壓度數沒改善

四十有三,愛睇通宵波、打通宵牌、兼有吸煙習慣的阿祥,年半前因胸口翳悶求診,經詳細檢查後證實患有高血壓。枕邊人祥嫂坦言:「佢驗到血壓高之後,飲食節制咗亦有做運動,但叫佢戒煙戒夜生活真係唔使諗,我驚佢遲早有日打牌叫胡會爆血管,所以當我知坊間有咩食材可以降血壓,我都盡量整俾佢食,近來睇報紙講到紅菜頭降血壓好掂,所以我就整紅菜頭湯,紅菜頭沙律同買現成紅菜頭汁俾佢飲。」祥哥苦笑道:「食咗個半月,都唔覺(血壓度數)好咗,係有瘦咗少少,不過餐餐咁食法,仙丹都食壞人啦!」

 

 

缺鉀性高血壓才有效

祥嫂當日睇嘅報章,引述英國與澳洲的醫學團體對紅菜頭的研究成果,證實每日飲用250毫升至500毫升紅菜頭汁有助降低血壓,長期飲用,心臟病死亡機會更下降一成。真係咁掂﹖註冊營養師陳國賓指出:「血壓高的成因好多,緊張、食煙、缺乏運動、高脂高鹽飲食及缺鉀等都會引致,若想靠食紅菜頭降血壓,可能只對缺鉀性高血壓有幫助,但若其他問題唔解決,相信未必有用。」

L1228_070_photo_2c

坑口街市差不多每個菜檔都有售賣紅菜頭,細問紅菜頭有何益處時,靚姐不諱言:「真係好有益,可以降血壓,又可以減肥!」更壓低聲線道:「好多藝人都嚟買!」

日食3-4個有助補血

其實紅菜頭是植物的根莖部分,含碳水化合物、纖維素、鉀、錳、鐵等微量元素以及礦物質,與所有植物一樣,都有抗氧化成效,抗氧化自然可以防癌、抗衰老、兼令血管擴張改善高血壓。對於補血而言,一個小型的紅菜頭含0.8毫克鐵質和100微克葉酸,而女士們每日需要18毫克鐵質及400微克葉酸,所以每日可能要食至少三至四個紅菜頭,才有補血效用。

 

有腎石膽石者慎服

另外,紅菜頭屬低脂食材,自然有護肝及提升淋巴系統的防禦功能,但陳國賓認為,每日進食足夠分量的蔬菜生果亦有相同效果。他坦言:「我曾有病人靠長期食西芹及飲木耳水等高鉀食材成功降血壓,但就未見過有人靠食紅菜頭的成功例子,對於食紅菜頭可以減肥,全因它屬高纖低脂食材,食得多自然會飽,食少咗其他嘢,當然可減磅啦。」不過他提醒,因紅菜頭與菠菜、莧菜一樣含較高草酸鹽,鈣質豐富,所以有腎石膽石的人士慎服。

(壹健康)