謝霆鋒同王菲自2014年嚟個世紀復合後,雖然愛得低調,但不時被發現甜蜜外遊,感情一直如膠似漆。

近日趁住好朋友徐濠縈生日,佢哋仲合體唱K,喺房入面互唱情歌,真係冧到爆!

話說3月7日就係徐濠縈嘅生日,一班朋友包括老公陳奕迅(Eason)、霆鋒、王菲等就去咗日本玩,夜晚齊齊去唱K慶祝,徐濠縈就喺社交網度甫咗幾條Eason、王菲、霆鋒合唱嘅現場片,Eason同王菲合唱《因為愛情》,貴為天后嘅王菲唱K都特別有氣勢,平時啲人都係揸住支咪唱,佢就要用咪Stand唱,似足開騷一樣夠晒霸氣。

之後佢哋繼續合唱霆鋒首本名曲《因為愛所以愛》,呢個時候鏡頭就影住Eason同霆鋒,雖然霆鋒冇份唱,不過見佢不時甜笑望住王菲,個樣真係冧到一個點。

期間Eason不停向後挨搵背脊撞霆鋒,示意霆鋒同王菲合唱,唔知係咪有鏡頭影住,霆鋒好決絕唔肯開金口,仲坐過一個位唔畀Eason撞佢。

雖然霆鋒就未有同王菲合唱,但係佢最後都有獻聲,就係同陳奕迅合唱佢哋唱過嘅英文金曲《Better Man》。

(on.cc東網)