點解選港姐?袁詠儀一句話令你收聲:「個個都話我靚,咁咩叫幾靚先得0架你明唔明呀?」就係因為咁,佢去咗選港姐。

1990年,19歲嘅袁詠儀,跑去選港姐。當時佢係留長髮,算是有番啲「女人味」:「我長頭髮,淨係長頭髮呢樣嘢囉,前凸後趷嗰啲我冇。」永遠都係T恤牛仔褲裝扮。話就話想測試下究竟自己有幾靚,但其實袁詠儀根本冇乜信心選到:「我諗住有免費旅行,我又去下咋!試一試囉!即係,我覺得我唔係好醜樣啫,我唔想第日後悔呀!我想去試下。「當然,你問我去選嘅時候嘅心態就係,如果我選到嘅,我梗係入娛樂圈啦!係咪先?唔通選到之後走番去讀書咩?係咪先?或者走去做文員咩?冇理由0架嘛!」就是愛袁詠儀這種坦白。

但其實,袁詠儀選美路上,都唔係一帆風順。佢遇到嘅第一個阻力,係做警察嘅袁爸爸。為咗一張報名表,父女冷戰一段長時間。結果袁詠儀屈服:「我答應過我爹哋,如果我選唔到,從此唔可以再提娛樂圈。」袁爸爸唔俾個女選美,理由很簡單:「佢話複雜喎!我諗同埋佢可能覺得,女仔人家,做乜要着泳衣行嚟行去呀嗰啲咁樣喇。」就係咁,袁爸爸一直唔睬個女,直到袁詠儀主動言和,佢話:「佢一路都唔睬我嘛,我覺得唔好囉咁樣,不如大家好好傾下喇。」一言為定。

過咗第一關,其他問題,都變得微不足道。例如選美黑幕。年年港姐都好似連續劇咁,是非成籮,分黨分派有後台,咁袁詠儀嗰屆呢?「你問我,我就唔覺得有嘅,可能真係我嗰個心態唔係一定要選到,我真係嚟玩嘅。」連勾心鬥角都冇?「你問我我梗係見到有啦!但係我唔喺嗰度囉!」

點解?「因為我成日覺得……香港小姐同我係唔係好……即係冠軍呀,同我唔係好match 0架!我成日覺得我係張曼玉嚟0架嘛,我係嗰啲嚟0架嘛!即係,第二第三我諗都應該仲有啲機,但冠軍就應該唔係好啱數嘅。」咁依家選到喇,點先?有冇諗「點解會係我?」

袁詠儀氣定神閒:「我靚囉!」「你問我其實係,我覺得我越選越想0架其實,老實啲講,即係可能semi final嘅時候我攞咗個最上鏡呢,我仲係覺得自己係張曼玉0架!」但傳媒係咁吹風話佢係大熱,加上有啲有機會嘅又篩走咗,咁,「咁唔多唔少嗰下個心都會有啲雄0架喇!都會有諗我會唔會係第一呢,我可能有機會0架喎嗰啲咁!但到宣佈嗰一刻,我都係覺得我攞第二嘅機會係大。」

筆者:但你攞第一喎
袁詠儀:係呀
筆者:咁你有冇啲意外驚喜呀?
袁詠儀:ummm….
筆者:定其實你嘅心係想第二0架?
袁詠儀(笑):係喇係喇!
筆者:點解想第二唔係第一?
袁詠儀(諗都唔諗):因為第二名可以即刻拍戲嘛!
筆者:唔使做港姐親善大使嗰啲嘢?
袁詠儀:係喇,又唔使去選(環球小姐),咁多歷屆都係咁0架喇
筆者:選完港姐阿二就可以即刻拍戲
袁詠儀(猛點頭):係喇係喇
筆者:咁其實你係想做幕前多好多?
袁詠儀(笑):都可以咁講。我鍾意表演囉!

咁爸爸點睇?「佢就梗係開心啦!笑到見牙唔見眼啦!」冇再反對?「冇喇,冇嘢好講㗎喇即刻!」其實選完港姐之後,袁詠儀仲做咗一件事,都係關袁爸爸事。袁爸爸嗜賭,袁家曾經有「財政問題」,稍後會有另文提及,這是後話。袁詠儀勸又勸過,冇用。結果,選完港姐之後,有一日,佢做咗件「好猛」嘅事。「我只係同佢講咗,其實你可以繼續賭㗎,不過呢,有一日我就會約晒你啲朋友出嚟食飯,然後我就會同佢哋講,你哋繼續同佢賭啦,但係我唔會負責任何一分錢。我唔會去還呢啲錢。嗰次之後,我覺得我爹哋真係徹徹地改變咗。」

(蘋果日報)