袁文傑張潔蓮不時於網上放閃曬恩愛。(袁文傑Facebook)

網上有唔少人分享激嬲女友小故事,好多時都因為女仔口不對心,男仔聽到口嗰句又估唔到心嗰句,咁咪出事囉。由田蕊妮主持嘅情人節特備節目《1+1的深情》,第一集搵來袁文傑張潔蓮擔任嘉賓。原來佢地拍拖七年嚟,袁文傑都未送過花俾Jacqueline﹗

袁文傑張潔蓮原來已經拍拖七年,隨住去年憑游生一角爆紅,令佢地不時有情侶檔合作機會。(袁文傑Facebook)

袁文傑去年憑住《不懂撒嬌的女人》霸氣游生一角爆紅,除咗佢自己工作機會大增,連帶佢嘅感情生活都被受注目,亦喺呢個時候大家先留意到,佢女友正正係細個日日睇兒童節目都見到嘅Jackeline姐姐張潔蓮﹗佢地兩個當年分屬唔同電視台,第一次見面原來都係勁老套嘅情節 — 朋友介紹,Jackeline妹妹車車安排佢地認識

呢一張沙龍照,就係令袁文傑一見傾心,決定要出手追求嘅契機。(影片截圖)

節目中佢地由相識經過傾到二人嘅小秘密,唔好睇袁文傑牛高馬大昂藏七呎,拍拖去睇恐怖片驚嘅居然係佢自己:「我又要睇又要驚,一睇到恐怖位就會挨住佢,係咁話好恐怖呀﹗」Jackeline都不禁笑言每次見到男友好似小朋友咁撒嬌,都會覺得好好笑。

有邊個會估到,足足189cm高嘅袁文傑居然會有撒嬌一面。(影片截圖)

拍拖七年,袁文傑居然從未送過花,佢望住Jacqueline好疑惑又壓低聲量咁話:「你好似講過唔使……」換來女友一句:「咩呀我無講過呀﹗」田蕊妮襯機會帶袁文傑到買花,於摩天輪附近拍攝時,趁Jacqueline不為意,袁文傑同一隊LIVE BAND於流動展覽車上深情唱出《追》,唱完之後更加送上七年來第一札花,令Jacqueline又驚又喜,流下幸福嘅眼淚,不禁話:「平日兩個人一齊佢一定唔會唱,有啲嘢平日唔做,忽然見到佢咁,真係會好感動架。」男士們記得學嘢啦﹗

袁文傑為女友送上意外驚喜,於摩天輪高歌一曲《追》。(影片截圖)
係感動嘅眼淚呀﹗(影片截圖)
又唱歌又送花,女主角仲感動到喊,難怪外界誤會袁文傑求婚啦。(影片截圖)
(HK01)