噚晚「修哥」胡楓喺紅館舉行一連兩場嘅《86破晒紀錄》演唱會頭場,除咗有修哥表演之外,仲有唔少好友契仔契女現身支持。完騷後傷哥接受傳媒訪問,記者問到修哥俾自己幾多分,佢仲反問大家好唔好睇,當大家表示好睇時,修哥又話:「嘩乜好似咗行咁嘅?不過開咁多次演唱會,今次都係比較辛苦,以前冇咁索氣,今晚索咗兩次。」

講到修哥86歲開騷破晒紅館紀錄,佢就話:「冇咩感受,主要都係想喺台上演出,但係86歲都係好難得嘅年齡我都好開心。」問到契仔學友都話要學修哥30年後要喺紅館開show,修哥就話:「我真係估唔到,每次我請學友嚟演唱會佢都唔喺香港,今次第三次我都冇搵佢,驚佢又推我,畀人推三次個心都唔安樂。都唔知邊個搞啲咁嘅嘢,好感動。」

仲請咗譚詠麟嚟,修哥就話:「冇諗到樂壇嘅至尊可以做我嘅嘉賓。」之後校長就話:「其實都好多人問我點解會做嘉賓,你記唔記得我哋有冇合作過?(修哥唔記得)其實我哋喺《江湖悲劇》合作過,我仲被你扑過,我都希望你可以完成我嘅心願,下次開《四個小生去旅行》可唔可以預埋我?我會負責揸咪,我都想知係真定假。」

修哥就答校長:「好多人問我,我都係冇答案,你哋話真就真,假就假。」校長話:「我睇就係真嘅,事實都係真,我亂講笑。我今日喺度可以睇到我唱歌可以唱到80後,到時唔知仲跳唔跳到舞。」修哥即話:「乜你開演唱會有跳過舞咩?」之後兩個就跳十字步。修哥又指校長都喺紅館開好多演唱會,校長就話係大家識貨,點知修哥就答:「佢哋識貨,但你等錢使。」

除咗有修哥嘅好朋友,仲有修哥嘅六個孫出場,仲話有啲喺外地返嚟,7個人唱完歌之後,仲有兩個曾孫出場送花,修哥又話佢哋兩個係佢嘅心肝椗。最後修哥六個孫加埋所有嘉賓一齊上台唱歌,為演唱會畫上句號。修哥話:「好感動,佢哋喺加拿大、英國等地返嚟搵我,聽我唱歌真係好感動。」

問到修哥係咪刪減咗啲曲目,修哥笑言:「真係好cut咗好多歌,何麗全囉請咗咁多嘉賓,搞到我冇得唱,第日唔好請咁多嘉賓。」修哥做話有張家輝、譚詠麟、羅蘭咁都好開心都令佢好開心,佢仲話:「聽講聽日仲多,可能到見我唱兩首歌已經破晒紀錄。」問到佢係咪唔夠喉,佢就話:「其實喺十日前失聲好擔心,醫生話我操勞過度,唔夠休息,因為我收埋自己練舞、操曲、跑步,嚇到我呢。今日都唔係完整狀態,有少少瑕疵。唱到最尾有少少咳,不過唔知大家知唔知。」

(蘋果日報)