今年45歲嘅吳美珩,曾經拍過《鑑證實錄》、《天地豪情》同《刑事偵緝檔案》系列,當年仲喺無綫當家花旦,佢喺01年同美藉華人富商王華麟結婚,但直至07年佢已婚嘅消息先至曝光,而同年7月佢為老公生咗囡囡Maegan後淡出娛樂圈專心相夫教女,到11年再為老公生咗二仔,一家四口生活幸福美滿。

近年大台啲小生花星走得就走,不得不搵舊人「救亡」,雖然淡出娛圈超過10年,不過吳美珩仲keep得非常好,多年嚟屢傳大台想搵吳美珩復出,不過做咗少奶奶多次嘅佢似乎真係無意回歸幕前,好友宣萱去年都幫好多開腔話對方無意復出幕前。

雖然吳美珩絕跡演藝圈,但就不時見到佢行街濕平。

日前(2月2日),記者又見到佢單拖喺中環出現。

吳美珩下午3點幾逛中環太子大廈童裝店,佢帶住黑超着長boot喺舖頭揀童裝,有外國店員招呼,見吳美珩專揀冷衫冷帽厚身衣物,估計係買比仔女。

期間吳美珩攞起啲衫拼埋身睇度長度,揀咗成個鐘,買咗5、6件衫,然後再另一間舖頭買咗啲童裝長袖底衫後,攞住兩袋戰利品離開。

(蘋果日報)